काठमाडौं (हाम्रो खेलकुद) – नेपाल कराते महासंघ, सितोरियो कराते डो लगनखेलले आइतबार शुभकामना कार्यक्रम आयोजना गरेको छ । दशै, तिहार, नेपाल सम्बत ११४२ र छठ पर्वको उपलक्ष्यमा कराते डो लगनखेलले आफ्नो हलमा आयोजना गरेको शुभकामना आदान प्रदान कार्यक्रममा खेल पदाधिकारी, खेलकर्मी, करातेका खेलाडी, प्रशिक्षक र खेलप्रेमीको सहभागिता रहको थियो ।

कार्यक्रमका मुख्य अतिथि नेपाली कांग्रेस खेलकुद विभागका सचिव तथा राष्ट्रिय खेलकुद परिषद् (राखेप) का पूर्व कोषाध्यक्ष मीनकृष्ण महर्जनले लगनखेल डोजोले थुप्रै अन्तर्राष्ट्रिय खेलाडी उत्पादन गरिसकेको चर्चा गर्दै देशको कराते विगतको जस्तो व्यवस्थित नरहको गुनासो गरे ।
डोजोका संस्थापक सानुलाल श्रेष्ठले सबैको प्रयासमा लगनखेलमा डोजो स्थापना गर्न सकेको स्मरण गर्दै सबै मिलेर अघि बढ्दा आउने दिनमा पनि खेलको विकास गर्न सकिने चर्चा गरे ।

लगनखेल डोजीका महासचिव विनोद महर्जनले सञ्चालन गरेको कार्यक्रममा नेपाल ओलम्पियन संघका नवनिर्वाचित अध्यक्ष ओलम्पियन दीपक विष्टले कराते खेलको विकासमा लगनखेल डोजोको भुमिका महत्वपूर्ण रहेको चर्चा गरे । करातेका मुख्य प्रशिक्षक हिरा सिंह डंगोल, राखेप कर्मचारी संघका पूर्व अध्यक्ष नारायणदेव राणा र लगनखेल डोजोका अध्यक्ष दीपक श्रेष्ठले कराते खेल र लगनखेल डोजोको चर्चा गरे ।

आठौं र नवौं दक्षिण एसियाली खेलकुद (साग) का स्वर्ण पदक विजेता समेत रहेका दीपक, आठौंका स्वर्ण र नवौं सागका कास्य पदक विजेता रवि महर्जन, आठौं सागका स्वर्ण पदक विजेता गंगाराम महर्जन र निता राई, १३ औं सागका स्वर्ण पदक विजेता विप्लभ श्रेष्ठ, दसौं सागका रजत पदक विजेता विनोद महर्जन र अमृता शाक्य, १३ औं सागका कास्य पदक विजेता मुकेन्द्र महर्जनलगायत लखनखेल डोजोका उत्पादन हुन् ।

हालै जर्मनीमा भएको चेम्निज ओपन कराते च्याम्पियनसिपमा एक स्वर्ण र एक कास्य पदक जितेका मुकेन्द्रलाई सोही अवसरमा नगदसहित सम्मान गरिएको थियो । हरेक वर्ष दशै,तिहार र नेपाल सम्बतमा डोजोले शुभकामना आदनप्रदान कार्यक्रम गर्दै आएको छ ।