गहतराज युवा तथा खेलकुद मन्त्री नियुक्त

काठमाडौं हाम्रो खेलकुद) – नेकपा माओवादी केन्द्रका महेश्वर जंग गहतराज युवा तथा खेलकुद मन्त्री नियुक्त भएका छन् । प्रधानमन्त्री शेरबहादुर देउवाले शुक्रबार मन्त्री परिषद् विस्तारको लागि सिफारिस गर्दा गहतराजलाई युवा तथा खेलकुद मन्त्रालयको जिम्मेवारी दिएको पाएका हुन् ।

राष्ट्रपति विद्यादेवी भण्डारीले प्रधानमन्त्री देउवाको सिफारिसमा गहतराजसहित १६ मन्त्री र २ राज्यमन्त्रीलाई शुक्रबार नियुक्त गरेकी हुन् । बाँके क्षेत्र नंम्बर १ बाट निर्वाचित गहतराज पहिलो पटक मन्त्री बनेका हुन् । राष्ट्रिय खेलकुद परिषद् (राखेप) का अध्यक्ष समेत रहने मन्त्री गहतराजले राखेप बोर्डको बैठकबाट नवौं राष्ट्रिय खेलकुदको मिति तय गर्नुपर्ने हुन्छ । गत वर्ष गठन भएको राखेपको अहिले सम्म बैठक बस्न सकेको छैन ।

तत्कालिन मन्त्री कृष्णगोपाल श्रेष्ठले असार ३० गते राखेप बोर्ड बैठकको डाकेपछि पछि सरकार ढलेपछि राखेप बैठक स्थगित भएको थियो । राखेप सदस्य सचिव रमेश सिलवालले फागुनमा नवौं राष्ट्रिय खेलकुद आयोजना गर्ने गरि तयारी भइरहेको बताएपनि राखेप बोर्डले औपचारिक निर्णय भने गरेको छैन । नवौं राष्ट्रिय खेलकुद गण्डकी प्रदेशले आयोजनाको जिम्मेवारी पाएको छ ।