विजय नेपाली, पोखरा

अन्तिम दुई मिनेटको अन्तरमा दुई गोल गरेपछि स्थानिय टोली स्पोर्ट्स क्यासल पोखराले दि राइजिङ क्लब धरानमाथि रोमाञ्चक जित निकाल्दै राष्ट्रिय ‘ए’ डिभिजन फुटसल लिगको फाइनलमा प्रवेश गरेको छ ।

पोखरास्थित बहुउद्देश्यीय कभर्डहलमा बुधबार भएको पहिलो क्वालिफायरमा द राइजिङ क्लब धरानमाथि ८–६ को रोमाञ्चक जित निकाल्दै स्पोर्ट्स क्यासलले फाइनलमा स्थान बनाएको हो । स्पोर्ट्स क्यासलले ४–६ ले पछि रहेको अवस्थामा खेललाई बराबरीमा ल्याउँदै अन्तिम दुई मिनेटमा दुई गोल गरेपछि रोमाञ्चक जित निकाल्न सफल भएको हो ।

स्पोर्ट्स क्यासलको जितमा किशोर गुरुङ र सुमित श्रेष्ठले ह्याट्रिक पुरा गर्दा सुरज गुरुङ र विजय गुरुङले समान एक गोल गरे । राइजिङका हेमन्त थापा मगर, सुदिप गुरुङ र मिलन राईले समान दुई गोल गरेपनि हार टार्न सकेन । स्पोर्ट्स क्यासलका किशोर गुरुङ प्लेयर अफ दि म्याच चुनिए । उनले ५ हजार रुपैयाँ हात पारे ।

यससँगै स्पोर्ट्स क्यासलले लिगको अन्तिम राउन्डमा भोगेको हारको बदला लिएको छ । स्पोर्ट्स क्यासल राउन्ड रोविन लिगको अन्तिम खेलमा राइजिङसँग ६–४ ले पराजित हुदै लिगमा पहिलो हार बेहोरेको थियो । अब स्पोर्ट्स क्यासलसँग हार बेहोरेको राइजिङले फाइनल प्रवेशका लागि एलिमिनेटरको विजेतासँग बिहीबार दोस्रो क्वालिफायर खेल खेल्नेछ ।

लिगको विजेताले १० लाख तथा उपविजेताले ५ लाख रुपैयाँ पाउनेछ । लिगको विंगर (एएलए–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् ।