काठमाडौं (हाम्रो खेलकुद) – गण्डकी प्रदेशमाथि सोझो सेटमा जित निकाल्दै विभागीय नेपाल पुलिस क्लब डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको पुरुषतर्फ समूह ‘बी’ को विजेता बन्दै क्वाटरफाइनलमा प्रवेश गरेको छ ।

पुलिससँगको हारले पनि गण्डकी समूह उपविजेताको रुपमा अन्तिम आठमा पुग्न सफल भयो । त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बुधबार भएको खेलमा पुलिसले गण्डकीलाई ३–० को सोझो सेटमा हरायो ।

पहिलो र दोस्रो सेटमा समान २५–१४ र २५–१४ को सेटमा सहज जित निकालेको पुलिसले तेस्रो सेट २५–१८ ले आफ्नो पक्षमा पार्न सफल भयो ।जितपछि पुलिसले समूहमा शत प्रतिशत तीन जित निकाल्दै ९ अंक जोड्यो । गण्डकीले ३ खेलबाट ५ अंक जोड्यो । यो समूहबाट मणिमुकुन्द भलिबल क्लब र दावाली मिलन क्लबले समूह चरण पार गर्न सकेन ।

यसअघि मंगलबार आर्मी समूह ‘सी’ बाट तथा एपिएफ समूह ‘डी’ को समूह विजेता बन्दै क्वाटरफाइनलमा पुग्न सफल भयो । समूह ‘सी’ बाट नयाँ बजार र समूह ‘डी’ बाट ढोरपाटन समूह उपविजेता बन्यो ।

च्याम्पियनसिपमा बुधबार पुरुषतर्फ मणिमुकुन्द र दावाली मिलन क्लब, टिप टप हेल्प नेपाल स्पोर्टस् क्लब र गल्कोर्ट स्पोर्ट्स क्लब तथा प्रदेश २ र बागमती प्रदेशबीच खेल हुनेछ । महिलातर्फ ढोरपाटन र नेपाल पुलिस क्लब तथा एभरेस्ट र आर्मीबीच प्रतिस्पर्धा हुनेछ ।