काठमाडौं (हाम्रो खेलकुद)– नेपाली ओलम्पियनहरुको संस्था नेपाल ओलम्पियन्स संघको बुधबार नेतृत्व चयन हुने भएको छ । १५ सदस्यीय कार्यसमितिको अध्यक्षका लागि नेपाल ओलम्पिक कमिटी (एनओसी) का पूर्व उपाध्यक्ष समेत रहेका रविराज थापा र व्यक्तिगत खेलका सर्वाधिक सफल खेलाडी दीपक विष्टबीच प्रतिस्पर्धा हुँदैछ ।

नेपाल ओलम्पिक कमिटी (एनओसी) मा आबद्ध ओलम्पियन्स संघमा उपाध्यक्ष, महासचिव, सचिव र कोषाध्यक्ष भने निर्विरोध भइसकेको छ । महिला उपाध्यक्षमा संगिना वैद्य, महासचिवमा राजेन्द्र भण्डारी, सचिवमा देवु थापा र कोषाध्यक्षमा स्नेहा राणा निर्विरोध चयन भएका हुन् । २ उपाध्यक्षमा एक महिला अनिवार्य छ । जसमा संगिना चुनिसकेकी छन् भने अर्को एक उपाध्यक्षका लागि रघुराज वन्त र प्रविण तुलाधरबीच प्रतिस्पर्धा हुने भएको छ ।

त्यस्तै ३ महिलासहित ९ सदस्यका लागि १० जनाको उम्मेदवारी परेको छ । समान ५ महिला र पुरुषले उम्मेदवारी दिएका छन् । राजकुमारी पाण्डे, विमला रानामगर, कान्छीमाया कोजु, फूलमाया क्याप्चाकी, प्रमिला रिजाल, मुकुन्द हरि श्रेष्ठ, विष्णुबहादुर सिंह, टीकाराम श्रेष्ठ, कमलबहादुर अधिकारी र राजेन्द्र प्रधानले सदस्यमा उम्मेदवारी दिएका छन् ।

निर्वाचनमा ५९ ओलम्पियनसँग मताधिकार रहेको छ । एनओसीका उपाध्यक्ष तथा कार्यकारी निर्देशक चतुरानन्द राजवैद्यले ओलम्पियनहरुलाई संगठित गर्नका लागि एनओसीले पहल लिए जनाउँदै ओलम्पियन्स एसोसियन स्वतन्त्र संघ भएको बताएका छन् । एनओसीले एसोसियनसको नेतृत्व चयनलाई लागि वरिष्ठ अधिवक्ता लोकभक्त राणाको संयोजनमा निर्वाचन समिति गठन गरेको छ । त्यसकै प्रयोजनमा लागि एनओसीले ओलम्पियनहरुलाई नाम दर्ताका लागि अव्हान गरेको राजवैद्यले बताए ।

‘सार्वजनिक अव्हान गरेको थियौं । ५९ ले मात्र दर्ता गर्नुभयो,’ उनले भने ,’ अब त्यहिबाट नेतृत्व चयन हुनेछ ।’ नेपालबाट ओलम्पियनमा भाग लिने खेलाडी एसोसियनको सदस्यका लागि योग्य हुनेछन् । नेपाली ओलम्पियनहरु एक सय भन्दा बढी रहेको अनुमान गरिएको छ । यद्दपी त्यसको यकिन संख्यामा भने छैन । तीमध्ये केहि विदेशमा रहेको र केहिको मृत्यु भइसकेको बताइन्छ ।

झन्डै दशक अघि सुनिललाल जोशीको अध्यक्षतामा ओलम्पियन्स संघ गठन भएको थियो । २०७४ जेठ २६ गते जोशीको निधन भएदेखि झण्डै दुई वर्ष संघ नेतृत्वविहन थियो । २०७६ जेठ २९ मा तत्कालिन उपाध्यक्षलाई संघको कार्यवहाक अध्यक्ष तोकिएको थियो । राखेपमा दर्ता त्यो एसोसियनलाई एनओसीले पनि मान्यता दिएको थियो ।

अध्यक्षका आकंक्षी थापाले मनोनयनका बारेमा जानकारी पाएपछि उम्मेवदारी दिएको बताए । ‘त्यस्तो धेरै उथुलपुथल गर्छु भन्दा पनि यो अवसरलाई सदुपयोग गरेको हो । जितिन्छ नै भन्ने छैन,’ उनले भने, ‘मलाई हार्न कुनै अप्ठेरो छैन । ओलम्पिकमा नकआउट भएको थिए । वाकओभर भन्दा नकआउट राम्रो हो । त्यसैले यहाँ पनि नकआउट हुँदा मलाई केहि फरक पर्दैन ।’

अर्का अकांक्षी विष्टले भने ओलम्प्यिनहरुको महत्व सबैलाई बुझाउन आवश्यक रहेको आफू निर्वाचित भएमा त्यसका लागि प्रयास गर्ने बताएका छन् । ओलम्पिक मुभमेन्टका बारेमा सबैलाई बुझाउन दिन जरुरी रहेको भन्दै विष्टले भने, ‘देशमा बढी भन्दा बढी ओलम्पियन हुन् भन्नका लागि खेल र खेलाडीको महत्व बुझाउन जरुरी छ । संघले त्यसमा प्रचारात्मक भूमिका निर्वाह गर्न सक्छ ।’