काठमाडौं (हाम्रो खेलकुद) – विश्वको प्रशिद्ध खेलकुद सामाग्री उत्पादक कम्पनी केल्मीको नेपाल स्थित एक मात्र आधिकारिक विक्रेता कामारु ट्रेडिङ प्रा. लि. ले कम्पनीको सामाग्री नक्कली उत्पादन तथा अनाधिकृत विक्री वितरण गर्नेलाई कारवाहीको चेतावनी दिएको छ ।

कामारुले एक प्रेस विज्ञप्ति जारी गर्दै हाल नेपालमा नै अनाधिकृत रुपमा उत्पादन गरिएका, विदेशमा उत्पादन गरि नेपालमा विक्री वितरण गरिएका तथा विदेशबाट कच्चा पदार्थ झिकाई नेपालमा तयार गरिएका केल्मीका विभिन्न नक्कली उत्पादनहरु विभिन्न व्यक्ति, संस्था, कम्पनी तथा निकायले नेपाली बजारमा विक्री वितरण गर्दै आइरहेको भेटिएको जनाएको छ । यस अनाधिकृत कार्यले अन्तर्राष्ट्रिय ब्रान्डको छविमा गम्भीर असर पुगेको बताउँदै राष्ट्रिय तथा अन्तर्राष्ट्रिय कानूनको समेत उल्लंघन भएको उल्लेख गरेको छ ।

कम्पनीले केल्मीका विभिन्न उत्पादनहरु कामारुबाहेक अन्य कुनै व्यक्ति, कम्पनी, संस्था वा निकायले अनाधिकृत रुपमा विक्री वितरण तथा उत्पादन गरेमा, गर्न लगाएमा वा गरेको पाइएमा नेपालको संविधान, पेटेन्ट डिजायन र ट्रेडमार्क ऐन २०२२, मुलुकी अपराध संहिता ऐन २०७४ लगायत राष्ट्रिय तथा अन्तर्राष्ट्रिय कानून बमोजिम हदै सम्मको कडा भन्दा कडा कारवाही जानकारी समेत गराएको छ ।

नेपालभर रहेका केल्मीका अधिकारिक शोरुम र विक्रेताबाट मात्र सामाग्री खरिद गर्न उपभोक्तालाई कामारुले अनुरोध गरेको छ ।

केल्मीले पछिल्लो समय विश्व खेलकुदमा आफ्नो बजार विस्तार गर्दै गएको छ । नेपालमा राष्ट्रिय फुटबल टोलीको प्रायोजनसँगै प्रवेश गरेको केल्मीले अहिले नेपालका तीनै विभागीय टोलीसँगै कराते र तेक्वान्दोको राष्ट्रिय टोलीलाई पनि प्रायोजन गरेको छ । गत साता मात्र ए डिभिजन क्लब न्युरोड टिम (एनआरटी) सँग केल्मीले ४ वर्षका लागि सम्झौता गरेको थियो ।

केल्मीले इंग्लिस प्रिमियर लिगको वाटफर्ड तथा स्पेनिस लिगमा पनि अलाभेस, एस्पान्योल लगायत टोलीलाई प्रायोजन गरेको छ । गत महिना मात्र एसियाली फुटबल महासंघसँग केल्मीले सन् २०२४ सम्मका लागि सम्झौता गरेको थियो ।