पोखरा (हाम्रो खेलकुद) – दोस्रो संस्करणको टाइगर कप आमन्त्रण पुरुष तथा महिला राष्ट्रिय क्लब भलिबल च्याम्पियनसिप आगमी माघ दोस्रो सातादेखि आयोजना हुने भएको छ ।

आयोजक टाइगर ग्रुपले दोस्रो संस्करणको टाइगर कप आगमी माघको १० देखि १५ गतेसम्म पोखरा रंगशालामा गर्ने निर्णय गरेको हो । यसपटक पुरस्कार राशिमा पनि बृद्धि गरिएको आयोजकले जनाएको छ ।

महिला पुरुषमा च्याम्पियन हुने टोलीले समान ३ लाख रुपैयाँ हात पार्ने आयोजकले जनाएको छ । दोस्रो हुने टोलीले १ लाख ५० हजार, तेस्रोले ७५ हजार तथा सान्त्वना टोलीले ३५ हजार हात पार्नेछ ।

गतवर्ष विजेताले १ लाख ५० हजार, दोस्रोले ७५ हजार तथा तेस्रो भएको टोलीले ३५ हजार र चौथो टोलीले १५ हजार रुपैयाँ प्राप्त गरेको थियो ।
सर्वोत्कृष्ट खेलाडी, व्यत्तिगत विधा र सहभागी टोलीबारे आयोजकले निर्णय गरिसकेको छैन । गतवर्ष पुरुषतर्फ गण्डकी प्रदेश, त्रिभुवन आर्मी क्लब, नेपाल र एपिएफ क्लब र नेपाल पुलिस क्लबले सहभागिता जनाएको थियो ।

महिलातर्फ नेपाल पुलिस क्लब, नेपाल एपिएफ क्लब, होङ्गान्जी न्यु डायमन्ड स्पोर्ट्स क्लब र त्रिभुवन आर्मी क्लबको सहभागिता रहेको छ । पुरुषततर्फ गण्डकी प्रदेशले विभागीय आर्मीमाथि ३–२ को सेटमा हराउँदै ऐतिहासिक उपाधि जितेको थियो । महिलामा एपिएफलाई हराउँदै पुलिस च्याम्पियन बनेको थियो ।