काठमाडौं (हाम्रो खेलकुद) – नेपाल बुद्धिचाल संघका पूर्वअध्यक्ष एवं सहकारी अभियन्ता स्व.राजेशहरि जोशीस्मृति फिडे रेटिङ्ग बुद्धिचाल प्रतियोगिताको पाँचौं चरणको खेल सकिँदा ५ खेलाडीले संयुक्त रुपमा अग्रस्थानमा रहेका छन् ।

कुमारीपाटीस्थित अग्नि पार्टी प्यालेसमा संचालित प्रतियोगिताको तेस्रो दिन बिहीबार चौथो र पाँचौं चरणको खेलपछि सजिलोसिभी डटकमका फिडेमास्टर रुपेश जैसबाल, थापाथलि चेस पार्कका फिडेमास्टर क्षितिज भण्डारी, डाइनामिक चेस एकेडेमी दमकका भुपेन्द्र निरौला, फिडेमास्टर मनिष हमाल र पूर्व नेपाल च्याम्पियन बद्रिलाल नेपाली समान साढे चार अंकका संयुक्त रुपमा अगाडि रहेका छन् ।

ललितपुर स्पोर्टस् क्लबद्धारा आयोजित प्रतियोगितामा एसियन एमेच्योर च्याम्पियन हेटौडाका कृष्ण थापा, भक्तपुरका युवा खेलाडी निकेन कुसाथा, दमकका राजन सुवेदी र सर्लाहीका कमल श्रेष्ठले समान ४ अंकसहित दोश्रो स्थानमा छन् ।

पाँच दिने प्रतियोगितामा स्वीस लिग अनुसार ९ चरणका खेलहरु हुनेछन् । प्रतियोगिताको विजेताले ५० हजार, दोश्राले ३० हजार, तेश्राले २० हजार रुपैयाँ प्राप्त गर्नेछन् । उत्कृष्ट ३३ जनाले कुल ३ लाख १० हजार रुपैयाँ पुरस्कार प्राप्त गर्ने आयोजकले जनाएको छ । चौथो दिन शुक्रबार छैटौं र सातौं चरणका खेल हुनेछन् ।