काठमाडौं (हाम्रो खेलकुद) – एएसबीसी युथ तथा जुनियर बक्सिङ प्रतियोगिताका पदक विजेता ३ खेलाडीसहित ४ सदस्यीय बक्सिङ टोली मंगलबार स्वदेश फर्किएको छ ।

भदौ ४ गतेदेखि संयुक्त अरब इमिरेट्स (युएई) मा भएको च्याम्पियनसिपबाट फर्केको टोलीलाई नेपाल बक्सिङ संघका अध्यक्ष राम अवाले, उपाध्यक्ष अर्जुनबहादुर केसी, प्रवक्ता श्याम अवाले, मुख्य प्रशिक्षक प्रकाश थापालगायतले त्रिभुवन अन्तर्राष्ट्रिय विमानस्थलमा स्वागत गरे ।
६ खेलाडीले प्रतियोगितामा प्रतिस्पर्धा गर्दा ३ खेलाडीले पदक जितेका थिए । स्वस्तिका तिरुवाले लाइट बेन्टम ५२ केजी मुन, नारिका राईले ५७ केजी मुनी र छिरिङ वाङ्दी शेर्पाले जुनियर ५४ केजी मुनि कास्य पदक जितेका थिए । ३ खेलाडीसहित ७ सदस्यीय टोली भने यसअघि नै फर्किसकेकोसंघले जनाएको छ ।

चावहिलको बक्समान्डुबाट खेल्ने छिरिङको यो दोश्रो अन्तर्राष्ट्रिय प्रतियोगिता हो । छिरिङले प्रतियोगिताका लागि धेरै मेहनत गर्नुका साथै ट्रेनिङमा बक्सिङ संघ र गुरुहरुले पनि धेरै सहयोग गरेका कारण सफलता प्राप्त भएको बताए । छिरिङले सफलताले आगामी दिनमा अझ बढी राम्रो गर्न हौसला बढेको बताउदै अबको लक्ष्य युथ च्याम्पियनसिप रहेको बताए ।

कांस्य विजेता खेलाडीत्रयले १ हजार अमेरिकी डलर नगद पुरस्कार जिते । सुलभ माली, इन्द्रबहादुर सुनार र सुदेन गिरीले प्रतियोगितामा भाग लिएका थिए । अध्यक्ष अवालेले खेलाडीको सफलताले बक्सिङ परिवार मात्र नभइ सिंगो मुलुकलाई गौरवान्वित तुल्याएको उल्लेख गर्दै नेपाली खेलाडी पनि कोहि भन्दा कम नभएको सन्देश दिन सफल भएको बताए ।