काठमाडौं (हाम्रो खेलकुद)– दुबईमा सञ्चालन भइरहेको एएसबीसी जुनियर तथा युथ ब्वायज एण्ड गल्र्स बक्सिङ च्याम्पियनसिपमा नेपाली बक्सर नारिका राई सेमिफाइनलमा पराजित भएका छन् ।

यसअघि नै कम्तीमा कास्य पदक पक्का गरिसकेका नारिका ५७ केजी मुनिको तौल समूहमा भारतीय खेलाडी प्रीतिसँग बुधबार पराजित भएकी हुन् । पहिलो र दोस्रो राउन्डमा टिक्न सफल नारिकाले तेस्रो राउन्डमा लगातार दवाव झेलेपछि अयोग्य सावित भइन् ।

यसअघि मंगलबार छिरिङ वाङ्दी शेर्पा जुनियर ५४ केजी तौल समूहको सेमिफाइनलमा काजस्तानका अडाल्बेक नियाज्बासँग पराजित हुदै तेस्रोमा सिमित बनेका थिए । नेपाली ६ खेलाडी सहभागी च्याम्पियनसिपका नारिका र छिरिङसहित तीन खेलाडीले कम्तीमा कास्यपदक पक्का गरेका छन् । कम्तीमा कास्य पदक पक्का गरिसकेकी स्वस्तिका तिरुवाले ५२ केजीमुनि सेमिफाइनल खेल्न बाँकी छ ।

यसअघि मुक्केबाज इन्द्र बहादुर सुनार इरानी प्रतिद्वन्द्वीसँग पराजित भएका थिए । ७१ केजी तौल समूहमा सुदेन गिरी आफ्नो तौलका विश्व वरियतामा अगाडि रहेका मुक्केबाजससँग आरएससीको आधारमा पराजित भएका थिए । अर्का मुक्केबाज सुलभ माली सोमबार ५४ केजी तौल समूहमा इरानी प्रतिद्वन्द्वी अलियस्घसँग पहिलो राउन्डमै पराजित भएका थिए । च्याम्पियनसिप असोज १५ गते सम्म चल्नेछ ।