काठमाडौं (हाम्रो खेलकुद)– खेल जीवनको सफलतामा आफैले अवार्ड जितेकी १३ औं दक्षिण एसियाली खेलकुद (साग) की स्वर्ण पदक विजेता सन्तोषी श्रेष्ठको नेतृत्वमा इयरले दिमोत्रिभा वारेन अवार्ड विजेताको छनोट गरिने भएको छ ।

नेपालको ग्रामिण क्षेत्रमा सामुदायिक स्वास्थ्य, शिक्षा, खेलकुद तथा माहिला सशक्तिकरणमा काम गरिरहेको संस्था द इयरले ट्रस्टले ‘इयरले–दिमोत्रिभा वारेन अवार्ड’को घोषणा गरेको छ । झन्डै दुई वर्ष अघि स्वदेशमा भएको सागको एथलेटिक्सको १० हजार मिटर दौडमा स्वर्ण जितेकी सन्तोषी अवार्ड छनोट समितिको निर्देशकका रुपमा क्रियासिल रहेकी छिन् । अवार्ड महिला तथा किशोरी सशक्तिकरणका लागि योगदान दिने व्यक्ति वा संस्थालाई प्रदान गरिने जनाएको छ ।

ट्रष्टले वार्षिक रुपमा अवार्ड विविध क्षेत्रमा उदाहरणीय कार्य गरेका महिला तथा किशोरीलाई समेत प्रदान गरिने लक्ष्य राखेको छ । त्यसमा विविधि उद्यम, खेलकुद, शिक्षा, स्वास्थ्य, अधिकार, न्याय, सेवा तथा समुदायिक क्रियाकलापमा उदाहरणीय प्रयास गरेकाहरु पर्नेछन् । आफ्नै तवरमा सशक्तिकरण भएका महिला तथा सशक्तिकरणमा योगदान पु¥याइरहेका जो कोही व्यक्ति वा संस्थालाई सम्मान र प्रोत्साहन गर्ने उद्देश्यका साथ अवार्ड दिने घोषणा गरिएको हो ।

अवार्ड विजेताले ३० हजार रुपैयाँ प्राप्त गर्नेछन् । त्यस्तै विजेताले गरिरहेको कार्यलाई थप सहज बनाउन अन्य सहायता पनि गर्ने गरी अवार्ड घोषणा गरिएको बताइएको छ । पुरस्कार राशी तथा सहायता हरेक वर्ष विस्तार गरिने ट्रष्टले जनाएको छ । नेपालको कुनैपनि क्षेत्रमा महिला तथा किशोरी सशक्तिकरणका लागि जुनसुकै प्रकारका योगदान गर्ने जुनसुकै उमेर समूहका नेपाली नागरिकले अवार्डको लागि निवेदन वा सिफारिस गर्न सकिने बताइएको छ । अवार्डको मनोनयनका लागि असोज १४ गते सम्म गुगल फारममार्फत निवेदन सकिने र निवेदन फारम ट्रस्टको वेवसाइटमा रहेको जनाएको छ ।

ग्रामिण विकास र सशक्तिकरणमा सक्रिय इयरले ट्रस्टले धादिङको सिद्धलेख गाउँपालिकामा समुदाय स्तरमा विद्यालय सञ्चालन गरिरहेको छ । त्यस्तै सामुदायिक शिक्षा तथा बालविकास, स्वास्थ्य, खेलकुद विविध उद्यमशीलता लगायतमा तालिम तथा शिविर सञ्चालन, आवश्यक सामाग्री प्रदान, छात्रवृत्ति तथा प्रायोजन, भौतिक संरचना निर्माण, वातावरण संरक्षण गर्ने कार्य गरिरहेको छ ।

ट्रस्टको संस्थापक जोन इयरले र ट्रस्ट सदस्य डोरियाना दिमित्रोभाको सक्रियतामा अवार्ड आयोजना गरिएको हो । दुवै युरेपेली नागरिक हुन् ।
सन्तोषी गत वर्षबाट ट्रष्टमा आबद्ध भएकी हुन् । उनी ट्रष्टको सद्भावना दुतका रुपमा क्रियासिल रहेकी छिन् । उनको खेल जीवनलाई निरन्तरता दिनका लागि पनि ट्रष्टले सहयोग गर्दै आएकी छिन् ।

सन्तोषीले पनि आफ्नो समयअनकुलमा ट्रष्टले उद्देश्य अनुरुपमा अनुभव साट्ने गरेकी छिन् । ‘म खेलाडीका साथै पब्लिक हेल्थको विधार्थी पनि हु । मेरो रुची अनुसार ट्रष्टको उद्देश्य भएकाले जोडिएको हु,’ उनले भनिन्, ‘यसमा मैले आफ्नो अनभुव र ज्ञानलाई साट्ने गरेको छु । मेरो खेल जीवन र भावनाले कसैलाई प्रेरित गर्यो भने खुसी लाग्छ ।’