काठमाडौं (हाम्रो खेलकुद) – हालै गठन भएको एथलेटिक्स परिवार नेपालले मंसिरमा युथ एथलेटिक्स च्याम्पिनसिप आयोजना गर्ने भएको छ । काठमाडौंमा मंसिर १८ गते हुने च्याम्पियनसिपमा छात्र र छात्रातर्फ यू १६, यू २० उमेर समूहको प्रतिस्पर्धा समावेश गरिने एथलेटिक्स परिवारले मंगलबार प्रेस विज्ञप्तीमार्फत जानकारी गराएको छ ।

च्याम्पियसिपमा यू १६ का १२ र यू २० का १६ गरि कुल २८ इभेन्ट्समा प्रतिस्पर्धा हुने बताइएको छ । छात्र छात्रा यू १६ मा ६० मिटर, सय मिटर, ८ सय मिटर, सटपुट थ्रो, लङजम्प र ४ गुणा सय रिलेको प्रतिस्पर्धा हुनेछ । त्यस्तै छात्र छात्रा यू २० मा सय मिटर, ४ सय मिटर, ८ सय मिटर, ३ हजार मिटर दौड, लङजम्प, हाइजम्प, सटपुट थ्रो, ४ गुणा सय मिटर रिले दौड समावेश हुने एथलेटिक्स परिवारका अध्यक्ष राजन खत्रीले जानकारी दिए ।

साउनमा गठन भएको एथलेटिक्स परिवारले भदौ १ गते पत्रकार सम्मेलनमार्फत आर्थिक वर्ष २०७८–०७९ को वार्षिक कार्यक्रम घोषणा गरेको थियो । समितिका अध्यक्ष खत्रीले यस आर्थिक वर्षका लागि चार खेलकुद प्रतियोगितालाई आफ्नो वार्षिक क्यालेन्डरमा राखिएको र विस्तारै प्रतियोगिताबाहेक अन्य गतिविधि पनि अगाडि बढाउँदै लैजाने बताएका थिए ।

सोही घोषणा अनुसार मंसिरमा काठमाडौंमा युथ एथलेटिक्स च्याम्पियनसिप (यु–१६, यु–२०) आयोजना हुन लागेको हो । माघमा नुवाकोटमा झिल्टुङ क्रसकन्ट्री दौड प्रतियोगिता, फागुनमा काठमाडौंमा गोल्डेन एथलेटिक्स मिट आयोजना गर्ने एथलेटिक्स परिवारको योजना छ । त्यस्तै २०७९ साउनमा खुला क्रसकन्ट्री दौड आयोजना गर्ने बताइएको छ । झिल्टुङसँग एथलेटिक्स परिवारको सहकार्य रहनेछ ।