काठमाडौं (हाम्रो खेलकुद) – राष्ट्रिय खेलकुद परिषद् (राखेप) का उपाध्यक्ष शिव कोइराला टोकियो ओलम्पिकमा सहभागी नहुने भएका छन् । टोकियो ओलम्पिक जानका केहि दिनको समय बाँकी रहँदा कोइरालाले प्रेस विज्ञप्ती गर्दै आफू नजाने जानकारी गराएका छन् ।

कोइरालाले असार ३१ गतेको मितिमा जारी विज्ञप्तीमा व्यक्तिगत कारणले आफू सहभागी हुन नसक्ने उल्लेख गरेका छन् । टोकियो ओलम्पिकमा भाग लिनका लागि शुक्रबार मात्रै १० सदस्यीय टोली त्यसतर्फ गएको थियो । आफू नजाँदा टोलीमा कुनै असर नपर्ने उल्लेख गर्दै कोइरालाले हाम्रो खेलकुदसँग भने, ‘को कसरी जाने भन्ने विषयमा हामी कहाँ प्रणाली छैन । यो समयमा म नभएर टोलीको सफलतामा असर पर्ने देखिन्न । सरकारी बजेटमा नजाउ भन्ने लाग्यो ।’

कुनै बैठक र छलफलबाट आफ्नो नाम सिफारिस नभएको जनाउँदै कोइरानाले विज्ञप्तीमार्फत नेपाल ओलम्पिक कमिटी (एनओसी) का अध्यक्ष जीवनराम श्रेष्ठलाई धन्यवाद दिएका छन् । उनले आफूलाई टोकियो ओलम्पिकमा एथलेटिक्सको व्यवस्थापक बनाइएको भन्ने पनि जानकारी नभएको बताएका छन् ।

एनओसीले कोइराला र राखेपका पूर्व उपाध्यक्ष समेत रहेको एनओसीको सहायक महासचिव पिताम्बर तिम्सिनालाई एथलेटिक्सको व्यस्थापक बनाएको जानकारी दिएको थियो । ५ खेलाडी ४ प्रशिक्षकसहित २६ सदस्यीय टोली टोकियो ओलम्पिकमा सहभागि हुने भनिएपनि अब त्यसमा एक जना घटेका छन् ।