काठमाडौं (हाम्रो खेलकुद)– राष्ट्रिय खेलकुद परिषद् (राखेप) को बुधबारका लागि बोर्ड बैठक स्थगित भएको छ । तत्कालिन युवा तथा खेलकुद मन्त्री कृष्णगोपाल श्रेष्ठले बुधबारका लागि बैठक डोकपनि उनी सो पदमा नरहेपछि बैठक स्वतः स्थागित भएको हो ।

सर्वोच्च अदालतको सोमबारको फैसलाबाट तत्कालिन केपी ओलीको सरकार स्वतः विघठन भएपछि राखेपको बैठक स्थागित भएको हो । खेलकुद मन्त्री राखेपको अध्यक्ष रहने राष्ट्रिय खेलकुद विकास ऐन २०७७ मा उल्लेख छ । जसले बैठक बोलाउनुभएको थियो उहाँ पद मुक्त भएपछि स्वत बैठक स्थगित भएको छ,’ राखेप सदस्य सचिव रमेशकुमार सिलवालले भने ।

‘गत वर्ष असार १७ गते खेलकुद एने लागू भएपछि पहिलो पटक राखेपको बोर्ड बस्ने तय भएको थियो । बोर्ड बैठकका लागि राखेप सदस्य सचिवको संयोजनकत्वमा रहेको कार्यकारी समितिले एजेन्डा तय गरिसकेको थियो ।

नयाँ ऐन लागू भएपछि त्यसअनुसार राखेपका उपाध्यक्ष, सदस्य सचिव र अन्य सदस्यहरुको चयन भएको थियो । ३७ सदस्यीय बोर्डमा केहि पदेन सदस्यहरुको नाम सम्बन्धित संस्थाले पठाउन बाँकी रहेको बताइएको छ । नेपाल ओलम्पिक कमिटी (एनओसी), नेपाल उद्योग वाणिज्य महासंघ र विश्व विद्यालयले आफ्ना प्रतिनिधि पठाउन बाँकी छ ।

ऐनमा वर्षमा कम्तीमा दुई पटक बोर्ड बैठक बस्नु पर्ने उल्लेख छ । नयाँ बोर्ड गठन भएको वर्ष दिन पुग्न लाग्दा अहिले सम्म बैठक बसेको छैन । ऐन लागू भएयता राखेपका अध्यक्ष रहने युवा तथा खेलकुद मन्त्री तीन जना फेरिइसकेका छन् । ऐन लागू गर्दा जगतबहादुर विश्वकर्मा युवा तथा खेलकुद मन्त्री थिए भने त्यसपछि दावा लामा, एकबाल मियाँले मन्त्रालय सम्हालेका थिए । अहिले कृष्णगोपाल श्रेष्ठ खेलकुद मन्त्री छन् । श्रेष्ठको अध्यक्षतामा राखेप बोर्ड बैठक बस्नेछ ।

लुम्बिनी प्रदेशमा २०७५/०७६ मा आठौं राष्ट्रिय खेलकुदको समापनका क्रममा राखेप बोर्ड बैठक बसेको थियो । तत्कालिन अध्यक्ष विश्वकर्माको उपस्थिति नहुँदा तत्कालिन उपाध्यक्ष पिताम्बर तिम्सिनाको अध्यक्षतामा बसेको बैठकले गण्डकी प्रदेशमा नवौं राष्ट्रिय खेलकुद आयोजना गर्ने निर्णय गरेको थियो ।