श्रेष्ठलाई खेलकुदसहित ५ मन्त्रालयको कार्यभार

काठमाडौं (हाम्रो खेलकुद) – कृष्णगोपाल श्रेष्ठले युवा तथा खेलकुदसहित ५ मन्त्रालयको कार्यभार सम्हाल्ने भएका छन् । सर्वोच्च अदालतले जेठ २१ र २७ गते गरिएको मन्त्री परिषद् विस्तारमा परेका उप प्रधानमन्त्री, मन्त्री तथा राज्यमन्त्रीको पदको कार्य नगर्नु गर्न नदिनु नदिलाउनु भनी अन्तरिम आदेश जारी गरेकोले उनीहरुले सम्हाल्दै आएका मन्त्रालयको कार्यभार अर्को व्यवस्था नभएसम्म प्रधानमन्त्रीसहित ५ मन्त्रीलाई तोकिएको छ ।

राष्ट्रपति कार्यालयले बिहीबार जारी गरेको विज्ञप्ती अनुसार श्रेष्ठले युवा खेलकुद, वन तथा वातावरण, शिक्षा, विज्ञान तथा प्रविधि, श्रम, रोजगार तथा समाजिक सुरक्षा र स्वास्थ्य तथा जनसंख्या मन्त्रालयको कार्यभार सम्हाल्नेछन् । प्रधानमन्त्री केपी ओलीले रक्षा र परराष्ट्रको समेत कार्यभार तोकिएको छ ।

उपप्रधानमन्त्री विष्णुप्रसाद पौडेलले अर्थ, गृहसहित ५, बसन्तकुमार नेम्बाङले भौतिक पूर्वाधार तथा यातायातसहित ५ मन्त्रालय तथा लिलानाथ श्रेष्ठले कानुनसहित ६ मन्त्रालयको जिम्मेवारी पाएका छन् ।