काठमाडौं (हाम्रो खेलकुद) – डिसहोम नेपालको सबै भन्दा ठूलो एच.डि र डिजिटल टेलिभिजन च्यानलहरुको प्रसारण र प्रसारण सेवाको संचालक हो । डिस होमका आफ्नै थुप्रै च्यानल पनि छन् । ७७ जिल्लामा सेवा संचालन भएकाले पनि डिसहोम दशेको सम्पूर्ण बजारमा सक्रिय छ ।

डिस होमले विभिन्न विधागत च्यानल सञ्चालन गर्ने क्रममा केहि वर्षअघि बाट खेलकुदलाई प्राथमिकतामा राख्दै एक्सन स्पोर्टस् च्यानलको प्रयासरण सुरु गरेको थियो । विभिन्न राष्ट्रिय प्रतियोगिताको प्रत्यक्ष प्रसारण गरेको एक्सन स्पोर्टस्ले सन् २०१८ को विश्व कप फुटबलको प्रत्यक्ष प्रसार गरेको थियो । त्यसले नेपाली दर्शकका माझ अलग्गै छाप छाड्न सफल भएको थियो । त्यसको मुख्य कारण थियो पहिलो पटक विश्व कपको नेपाली भाषामा कमेन्ट्री गरिएको थियो । सुरुका केहि दिनमा आलोचना भएपनि विस्तारै नेपाली भाषाको कमेन्ट्रीले लोकप्रियता पाएको थियो ।

अहिले युरो कप जारी छ । युरो कपको पनि एक्सन स्पोर्टस्ले प्रत्यक्ष प्रसारण गरिरहेको छ । त्यसको पनि नेपाली भाषामा कमेन्ट्री भइरहेको छ । देशका सहरी क्षेत्रमा भन्दा पनि ग्रामिण भेगमा भने नेपाली कमेन्ट्री मन पराइएको डिस मिडिया नेटवर्क प्रालीका महाप्रबन्धक रमेश सापकोटा बताउँछन् । उनका अनुसार नेपाली कमेन्ट्री रुचाउनेको संख्या बढी छ ।

‘हामीले आफ्नो फेसबुक पेसमार्फत एउटा सर्वेक्षण गरेका थियौं । त्यसमा ६० प्रतिशतले नेपाली कमेन्ट्री मन पराउनु भएको प्रतिक्रिया पाएका छौं,’ सापकोटाले भने, ‘त्यसले हामीलाई उत्साहित बनाएको छ । आउने दिनमा ठूला प्रतियोगितामा यसरी नै नेपाली कमेन्ट्री गर्ने योजनामा छौं ।’

सिम र प्रभु टिभीलाई पनि डिसहोमले आफ्नो बनाइसकेको छ । त्यसपछि डिसहोमका आफ्नै ग्राहकसंख्या झन्डै २५ लाख रहेको सापकोटाले जानकारी दिए । त्यसबाहेक एक्सन स्पोर्टस अधिकांश अन्य पे टिभीले प्रसारण गरिरहेका छन् । आफ्ना र अन्य पे टिभीमा गरि भन्डै ३५ लाख ग्राहककोमा एक्सन स्पोर्टस् हेर्ने सकिने सापकोटाले बताए ।

राष्ट्रिय र अन्तर्राष्ट्रिय प्रतियोगिताको प्रत्यक्ष प्रसारण हेर्नका लागि र स्थानिय खेललाई पनि दर्शकमाझ पुर्याउनका लागि एक्सन स्पोर्टस् च्यानल सुरु गरेको जनाउँदै सापकोटाले भने, ‘हामीले अझ धेरै गर्न बाँकी छ । जे गर्दै छौं यो सुरुवात हो । आउने दिनमा यसलाई अझै विस्तार गर्दै लानेछौं ।’

युरोमा नेपाली कमेन्ट्रीलाई विकल्पका रुपमा प्रयोग गरिएको पनि सापकोटाले बताए । सबैले इंग्लिस कमेन्ट्री बुझ्नु हुन्छ भन्ने छैन, उनले भने, ‘त्यसले हामीले भाषा रोज्न पाउने विकल्प राखेका छौं । नेपाल र अग्रेजी मध्ये जुन आफुलाई सहज र सुन्न मन पर्छ दर्शकले त्यसमै सुन्न सक्नुहुन्छ ।’ युरो कप सिंगापुरबाट फिड लिएर प्रसारण गरिएकोले डिस होम र अन्य प्रसारणमा १२ सेकेण्डको अन्तर रहेको छ । उनले भने, ‘प्रत्यक्ष प्रसारणमा हामी १२ सेकेण्डले अगाडि छौं ।’

इटालीको बलियो सम्भावना

डिस मिडिया नेटवर्क प्रालीका महाप्रबन्धक सापकोटा आफैं पनि फुटबलका कट्टर समर्थक हुन् । नेपालपछि उनको दोस्रो रोजाई इटाली हो । सन् १९९४ देखि नै उनी इटालीका समर्थक हुन् । रोबोटो बाजियोकै कारण उनी इटालीलाई समर्थन गर्दै आएका छन् । इटालीमाथि रक्षात्मक फुटबल खेल्ने आरोप लाग्ने गरेको सापकोटालाई पनि थाहा छ ।

सापकोटा यसपटक भने इटाली फरक ढंगले प्रस्तुत भएको बताउँछन् । ‘रक्षात्मक मात्र खेल्छ भन्ने इटाली यसपटक फरक ढंगले प्रस्तुत भएको छ,’ उनले भने, ‘अहिले एट्याकिङमा पनि उत्कृष्ट देखिएको छ । लगातार दुई खेल ३–० ले जित्नु त्यसकै प्रमाण हो । रक्षापक्तिमा त उत्कृष्ट थियो नै अब आक्रमणमा पनि उत्कृष्ट हुने क्रममा छ । इटालीको अर्को बलियो पक्ष भनेको अनुभवी प्रशिक्षक र युवा खेलाडीको बाहुल्यता हो । रक्षात्मक मात्र खेल्छ भन्नेलाई आलोचकलाई इटालीले राम्रै जवाफ दिएको छ ।’

प्रिमियर लिग पछ्याउने कारणले इटालीपछि उनलाई मनपर्ने टोली इंग्ल्यान्ड हो । ‘टिभीमा देखिराखेका खेलाडी हुँदा पनि सद्भाव हुँदो रहेछ’, सापकोटा भन्छन्, ‘ह्यारी केनको कप्तानीमा इग्ल्यान्डले पछि केहि वर्षयता राम्रो खेलिरहेको छ । इटालीले यसपटक युरो कप उचाल्नेमा आशावादी सापकोटा फ्रान्स र बेल्जियमलाई पनि बलियो दाबेदार मान्छन् ।

‘फ्रान्स विश्व कप विजेता टोली हो । जहिले पनि दाबेदारका रुपमा रहेको छ । उसका खेलाडी पनि एक सय एक छन् । इटाली नहुँदा विश्वकपमा फ्रान्सलाई नै समर्थन गरेर हरेको थिए ,’ उनले भने, ‘यसपटकको युरो पनि निकै रोचक हुने समूह चरणले नै देखाइसकेको छ ।’

बेल्जियमलाई उनी उत्कृष्ट फुटबल खेल्ने टोलीका रुपमा बुझ्छन् । ‘बेल्जियम राम्रो खेल्ने टोली हो, तर दुर्भाग्य त्यो अनुसारको सफलता प्राप्त गर्न सकिरहेको छैन,’ सापकोटाले अनुमान लगाए, ‘यसपटक पनि निकै अगाडि सम्म पुग्ने सम्भावना देखिन्छ । तर त्यसका लागि टोलीले आफ्नो लयलाई यथावत राख्नुपर्ने हुन्छ ।’