विष्ट र अवस्थीद्वारा पवित्र समाजलाई सहयोग

काठमाडौं (हाम्रो खेलकुद) – ओलम्पियन दीपक विष्ट र व्यवसायी राजु अवस्थीले बुढानिकण्ठ नगरपालिका ४ स्थित पवित्र समाज सेवा नेपाललाई खाद्यान्न सहयोग गरेका छन् । केहि दिनका लागि पुग्ने गरि विष्ट र अवस्थीले चामल, दाल, आलु, नुन तेललागयका खाद्यान्न सामाग्री सहयोग गरेका हुन् ।

झन्डै दुई दशकदेखि दिक्षा चापागाईको नेतृत्वमा सञ्चालन भइरहेको पवित्र समाज सेवामा ववारिसे बालबालिका, बृद्ध बृद्धा, अशक्तहरुलाई आश्रय दिइरहेको छ । चापागाईका अनुसार समाजमा अहिले ६२ जनाले आश्रय लिइरहेका छन् । चापागाईका अनुसार देश विदेशमा रहेका नेपालीले व्यक्तिगत रुपमा गर्ने सहयोगकै आधारमा संस्था सञ्चालन भइरहेको छ ।

‘दीपक दाईहरुले पहिला देखि नै सहयोग गर्दै आउनु भएको छ,’ पवित्र समाजकी अध्यक्ष चापागाईले भनिन्, ‘अहिले कोरोना महामारीको दोस्रो लहरले हामीलाई थप अप्ठेरो परेको बेलामा उहाँहरुले सम्झेर सहयोग गरिदिनु भएको छ । त्यसका लागि उहाँहरुलाई धन्यवाद दिन चाहन्छु । त्यसै अहिले सम्म हामीलाई सहयोग गर्ने सबै प्रति आभारी छौं ।’

गत वर्ष कोरोनाको पहिलो लहरमा पनि विष्टलगायत दक्षिण एसियाली खेलकुदका पदक विजेता, राष्ट्रिय तथा अन्तर्राष्ट्रिय खेलाडी संघ र अन्य खेलाडीले आर्थिक अवस्था कमजोर भएकाहरुलाई खाद्यान्न लगायतको सहयोग गरेका थिए ।