पोखरा (हाम्रो खेलकुद) – नेपाल रिङ रेस्लिङ संघको आयोजनामा शुक्रबार र शनिबार आयोजना हुने दोश्रो राष्ट्रिय रिङ रेस्लिङ च्याम्पियनसिप २०२१ मा भाग लिन खेलाडीहरु पोखरा आइपुगेका छन् ।

पोखरा रंगशालाको वहुउद्देश्यिय कभर्ड हलमा आयोजना हुने प्रतियोगिताको तयारीमा जुटेका खेलाडी काठमाडौबाट बुधबार पोखरा आएका हुन । पोखरा आएका ४० भन्दा वढी खेलाडी तथा अफिसियलहरुलाई पोखरा महानगरपालिकाको तर्फबाट महानगर प्रमुख मान बहादुर जि.सीले स्वागत गरेका छन् ।
पोखरा रंगशालामा आयोजित स्वागत कार्यक्रममा बोल्दै महानगर प्रमुख जि.सीले सुन्दर नगरी पोखरामा खेलाडीलाई स्वागत गर्न पाउनु सुखद रहेको बताए । उनले भने “पोखरा आफैमा सुन्दर नगर मात्रै होइन खेलकुदको हव पनि हो । हामी पोखरा महानगर सबै वडामा खेलकुदको मैदान बनाउनु पर्छ भन्ने मान्यताका साथ अभियानमा जुटेका छौं ।” पोखरामा हुने प्रतियोगिताले पोखरामा रिङ रेस्लिङ खेलको विकास र विस्तारमा समेत सहयोग पुग्ने भन्दै उनले सवै खेलाडीलाई जितको शुभकामना व्यक्त गरे ।

पश्चिमाञ्चल क्षेत्रिय खेलकुद र जिल्ला खेलकुद विकास समितीको आयोजनामा भएको स्वागत कार्यक्रममा राष्ट्रिय खेलकूद परिषद (राखेप)का सदस्यद्वय राजेश कुमार गुरुङ र सुवर्ण श्रेष्ठ, क्षेत्रिय खेलकुदका कार्यालय प्रमुख लक्ष्मण प्रसाद योगी, जिल्ला खेलकूदका कार्यालय प्रमुख प्रकाश बराल, भलिबल संघका अध्यक्ष भिम पराजुली, राष्ट्रिय तथा अन्तर्राष्ट्रिय खेलाडी संघ कास्कीका अध्यक्ष दिपक बहादुर गोदार, प्रतियोगिताका स्थानिय संयोजक नुना गुरुङ लगायतले पनि खेलाडीलाई स्वागत गरेका थिए ।

प्रतियोगितामा नुवाकोटे टाइगर, थागु, द यूव, डेभिड, साइन, टुप्पी ग्याङ, एक्स हिरो, सोफी, दिलाशा, चट्टान, लेडी एञ्जल, किङ रोवर्ट, तन्नु, सिजे, यूविएल, एससी, हुम्ली फाइटर, योगी, जोनलगायत महिला तथा पुरुष खेलाडीले प्रतिस्पर्धा गर्नेछन् । उनीहरुले ३ वटा वेट क्याटोगरीमा प्रतिष्पर्धा गर्ने भएको संघकी महासचिव सुवर्ण श्रेष्ठले जानकारी दिएकी छन ।
प्रतियोगितामा प्रथम हुने खेलाडीले १ लाख रुपैयाँसहित च्याम्पियन बेल्ट र दोस्रोले ५० हजार रुपैयाँसहित मेडल प्राप्त गर्नेछन । प्रतियोगितामा झन्डै २९ लाख रुपैयाँ खर्च हुने अनुमान रहेको आयोजकले जनाएको छ । दर्शकलाई थप मनोरञ्जन दिन नेपालका चर्चित हास्य कलाकार सन्दिप क्षेत्रीको विशेष प्रस्तुती रहने बताइएको छ ।