काठमाडौं (हाम्रो खेलकुद)– राष्ट्रिय खेलकुद परिषद् (राखेप) का सदस्यद्वय एकेन्द्र बहादुर कुँवर र नन्दा बस्याल राखेपको कार्यकारी समितिमा मनोनित भएका छन् । मन्त्री स्तरीय निर्णय अनुसार अछामका कुँवर र सुर्खेतकी बस्याल मनोनित भएका हुन् ।

राष्ट्रिय खेलकुद विकास ऐन २०७७ अनुसार ७ सदस्यीय राखेप कार्यकारी समिति रहने व्यवस्था छ । राखेपका सदस्य सचिव संयोजक रहने समितिमा २ पदेन सदस्य रहने प्रावधान छ । राखेपका अध्यक्ष समेत रहेका युवा तथा खेलकुद मन्त्री दावा लामा तामाङले बुधबार उनीहरुलाई समितिमा मनोनयन गरेको मन्त्रालयले उपलब्ध गराएको पत्रमा उल्लेख छ ।

कुँवर सुदूरपश्चिम र बस्याल कर्णाली प्रदेशतर्फबाट बोर्ड सदस्यमा नियुक्त भएका थिए । सुर्खेतमा रहेकी बस्यालले मन्त्रालयबाट फोनमार्फत कार्यकारी समितिको सदस्यमा मनोनित भएको जानकारी पाएको बताइन् । कार्यकारी समितिमा रिक्त २ सदस्य राखेप बोर्डले मनोनयन गर्नेछ । जसमा एक महिला र एक पुरुष रहनेछन् । खेलकुद मन्त्रालयका खेलकुद महाशाखाका प्रमुख र राखेप प्रशासन विभावका प्रमुख समितिमा पदेन सचिव रहने व्यवस्था छ ।

ऐन अनुसार कार्यकारी समिति ७ सदस्यीय हुने उल्लेख छ । सदस्य सचिव संयोजकत्वको समितिमा खेलकुद मन्त्रालयका खेलकुद महाशाखा प्रमुख पदेन सदस्य र राखेपको प्रशासन विभाग प्रमुख पदेन सचिव रहने व्यवस्था छ । असार १८ गते कार्यान्वयनमा आएको खेलकुद ऐनबाट राखेप बोर्ड गठन भएपनि अहिले सम्म बैठक भने बस्न सकेको छैन ।