इलाम (हाम्रो खेलकुद) – जिल्ला भलिबल संघ इलामको आयोजनामा दोस्रो संस्करणको ईलाम आमन्त्रण खुल्ला पुरुष भलिबल प्रतियोगितामा त्रिभुवन आर्मी क्लबले लगातार दोस्रो जित हात पारेको छ ।

इलामको ठूलो टुडिखेल मैदानमा भएको पहिलो प्रतिस्पर्धात्मक खेलमा आर्मीले गौरादह नगर खेलकुद बिकास समितिलाई ३-२ को सेटमा पराजित गर्दै आर्मीले लगातार दोस्रो जित हात पारेको हो । आर्मीले गौरादहलाई २५-२०, २२-२५, २३-२५, २५-१४ र १५-८ ले हराउँदै विजयी सुरुवात गरेको हो ।

पहिलो सेटमा विजयी भएको आर्मीले दोस्रो र तेस्रो सेटमा भने लगातार पराजित भएको थियो । तर चौथो र पाँचौं सेटमा उत्कृष्ट प्रर्दशन गर्दै जित निकालेको हो । चौथो सेटमा उत्कृष्ट पूनरागमन गर्दै आर्मीले २५-१४ को सोझो सेटमा जित निकालेको थियो । निर्णायक पाँचौं सेटमा आर्मीले १५-८ हराउँदै लगातार दोस्रो सेटमा जित निकालेको हो ।

पहिलो खेलमा आर्मीले विमान ट्रेडर्स विर्तामोडलाई ३–२ को सेटले पराजित गर्दै विजयी सुरुवात गरेको थियो । गौरादहको यो लगातार दोस्रो हार पहिलो पहिलो खेलमा गण्डकी प्रदेशसँग ३-० को सोझो सेटमा पराजित भएको थियो । दोस्रो खेलमा समूह बी को विभागीय टोली नेपाल एपिएफ क्लब र दमक नगर भलिबल क्लबबीच प्रतिस्पर्धा हुने छ । खेल दिउँसो १२ बजे सुरु हुने छ ।

एपिएफले पहिलो खेलमा नेपाल पुलिस क्लबलाई ३–२ ले पराजित गर्दै विजयी सुरुवा गरेको थियो । दिनको तेस्रो खेलमा गण्डकी प्रदेश र विमान ट्रेडर्स विर्तामोडबीच प्रतिस्पर्धा हुने छ । यो जितसँगै आर्मी समूह एबाट २ खेलमा ४ अंकका साथ शीर्षस्थानमा उक्लिएको छ । गण्डकी ३ अंकका साथ दोस्रो स्थानमा छ ।

प्रतियोगिता ४ देखि ८ चैतसम्म हुदैछ । प्रतियोगितामा ७ टोलीको सहभागिता छ । लिग कम नकआउटका आधारमा हुने प्रतियोगितामा सहभागी ७ टोलीलाई दुई समूहमा विभाजन गरिएको छ । समूह ‘ए’ मा त्रिभुवन आर्मी क्लब, विमान ट्रेडर्स, गौरादह नगर खेलकुद बिकास समिति र गण्डकी प्रदेश छन् ।

समूह ‘बी’ मा नेपाल एपिएफ क्लब, नेपाल पुलिस क्लब र दमक नगर भलिबल क्लब छन् । समूहका शीर्ष दुई टोलीले सेमिफाइनलमा स्थान बनाउनेछ । प्रतियोगिताको विजेताले २ लाख रुपैयाँ प्राप्त गर्नेछन् । दोस्रो हुने टोलीले १ लाख तथा तेस्रो हुने टोलीले ५० हजार रुपैयाँ हात पार्नेछन् ।