काठमाडौं (हाम्रो खेलकुद) – धरान उपमहानगरपालिकाको वडा नं ९ र विराटनगर महानगरपालिका वडा नं ३ देशव्यापी अन्तर वडा टेबल टेनिस प्रतियोगिताको पुरुष इभेन्ट्सको उपाधिका लागि भिड्ने भएका छन् ।

लैनचौरस्थित टेबल टेनिस प्रशिक्षण केन्द्रमा बुधबार भएको सेमिफाइनलमा धरान उप महागरको वडा नं ९ ले ललितपुर महानगरको वडा नं ९ लाई ३–२ ले विराटनगर महानगर वडा नं ३ ले धरान उप महानगर १२ लाई ३–१ ले पराजित गर्दै फाइनल भेट पक्का गरेका हो । महिला टिम इभेन्ट्सको उपाधि यसअघि नै भक्तपुर नगरपालिकाको वडा नं ५ ले जितेको थियो ।

प्रतियोगिताको तेस्रो दिन पुरुष एकल र महिला एकलका विभिन्न चरणका खेल सम्पन्न भएका छन् । महिला एकलतर्फ भक्तपुर नगरपालिका वडा नं १ बाट दिया देउला, वडा नं २ बाट प्रदिपा सुवाल र क्यारिना सुवाल, वडा नं ५ बाट नर्मदा खाइतु , नुवाकोट बाट बिनु तामाङ , धरान उपमहानगर वडा नं १० बाट अन्जली ठाकुर , पर्वत नगरपालिका वडा नं ३ बाट प्रकृति राना , गोदावरी नगरपालिका १ बाट प्रनिका कुँवर, वडा नं ९ बाट सतिश्मा थापा अन्तिम १६ मा पुगेका छन् ।

त्यस्तै ललितपुर महानगर वडा नं १२ बाट इभाना थापा, बुटवल उपमहानगर वडा नं ८ बाट गीता अर्याल, काठमाडौँ महानगर वडा नं २ बाट सुभश्री श्रेष्ठ, वडा नं १७ बाट अस्मिता मानन्धर, झापा गाउँपालिका वडा नं ६ बाट अनुष्का प्रसाई , नवलपरासी वडा नं १ बाट योंग्गी पौडेल र संखुवासभा वडा नं ४ बाट बिएन्का राइ महिला एकलको प्रिक्वार्टरफाइनल पुगेकी छन् ।