बिर्तामोड (हाम्रो खेलकुद) – राष्ट्रिय फुटबल टोलीका रक्षक अनन्त तामाङ र उसुकी जुनी राई चौथो झापा स्पोर्टस अवार्डमा बर्षका उत्कृष्ट खेलाडी घोषित भएका छन् ।

नेपाल खेलकुद पत्रकार मञ्च झापा समन्वय शाखाले शुक्रबार साँझ बिर्तामोडमा अवार्ड कार्यक्रम आयोजना गरेको थियो । २०७६ सालमा गरेको प्रदर्शन र उपलब्धिका आधारमा छनोट भएका खेलाडीमध्येबाट अनन्त र जुनी विजेता बनेका हुन् ।

झापाका अनन्तले उत्कृष्ट खेलाडीको अवार्ड जित्दै एक थान मोटरसाइकल प्राप्त गरे । सो विधामा फुटबलरकै छिरिङ गुरुङ र सेसेहाङ आङदाम्बेलाई पछि पार्दै अनन्तले उत्कृष्ट चुनिएका हुन् । गत वर्ष स्वदेशमा आयोजना भएको १३ औं दक्षिण एसियाली खेलकुद (साग) मा नेपालले स्वर्ण पदक जित्दा अनन्त टोलीका सदस्य थिए । अनन्तको अनुपस्थितमा उहाँको उपाधि दाजु फुर्वाले अवार्ड ग्रहण गरे ।

महिलातर्फ उत्कृष्ट बर्ष खेलाडी इलामकी जुनीले एक थान स्कुटर प्राप्त गरिन् । जुनीले जुडोकी देविका खड्का र फेन्सिङकी कमला श्रेष्ठलाई पछि पारेकी थिइन् । यस्तै बर्ष उत्कृष्ट युवा खेलाडीको अवार्ड फुटबलका रेजिन सुब्बाले जिते । झापाका रेजिनले अवार्डसहित २५ हजार रुपैयाँ प्राप्त गरे । र अवार्ड प्राप्त गनुभयो । रेजिनले कबड्डीकी अनुजा कुलुङ र जुडोकी मनिता श्रेष्ठ प्रधानलाई पछि पारे ।

१३ औं सागमा कराते टोलीका मुख्य प्रशिक्षक मदनकुमार उप्रेती बर्षका उत्कृष्ट प्रशिक्षक चुनिए । उनले अवार्डसहित २५ हजार रुपैयाँ प्राप्त गरे । मछिन्द्र क्लबका प्रशिक्षक प्रवेश कटुवाल र पौडीका ओङदेन लामालाई पछि पार्दै उप्रेती उत्कृष्ट प्रशिक्षक चुनिएका हुन् ।

महिला राष्ट्रिय फुटबल टोलीकी गोलरक्षक एन्जिला तुम्बापोले पिपल्स च्वाइज अवार्ड जितिन्। उनले २५ हजार रुपैयाँ सहित ट्रफी प्राप्त गरिन् । ओलम्पियन डम्बर कुँवर लाइफटाइम अचिभमेन्ट अवार्डबाट सम्मानित भए । उनले अवार्डसँगै ३५ हजार रुपैयाँ प्राप्त गरे ।

खेलकुद क्षेत्रमा विशेष योगदान गरेका बक्सिङ प्रशिक्षक डम्बर लिम्बू र शारिरीक सुगठनका राम दाहाललाई ‘स्पेशल अचिभमेन्ट अवार्ड’ प्राप्त गरे । लिम्बू र दाहालले अवार्ड र २५ हजार रुपैयाँ प्राप्त गरे । २०६६ सालमा स्थापना भएको मञ्च समन्वय शाखा झापाले पूर्व फुटबलर आशिषविक्रम नेम्वाङको स्मृतिमा चार बर्षदेखि अवार्ड कार्यक्रम आयोजना गर्दै आएको छ ।