मध्यपुर (हाम्रो खेलकुद) – अन्नपूर्ण पोष्ट राष्ट्रिय दैनिकका समाचार संयोजक रोशन सिंह राउत एनएनआइपिए पत्रकारिता सम्मानबाट पुरस्कृत भएका छन् ।

राष्ट्रिय तथा अन्तर्राष्ट्रिय खेलाडी संघ (एनएनआइपिए) ले शनिबार मध्यपुर ठिमीमा स्पोर्टस अवार्डको १५ औं सस्करण आयोजना गर्दा राउतलाई पत्रकारिता सम्मान प्रदान गरेको हो । उनले सम्मान पत्रसहित २५ हजार रुपैयाँ प्राप्त गरे ।

झन्डै ३ दशकदेखि पत्रकारितामा सक्रिय राउत २ दशकयता अन्नपूर्ण पोष्टमा कार्यरत छन् । २०४८ मा सप्तरी जिल्लामा सगरमाथा आवाजमा संवाददाताका रुपमा राउतले पत्रकारिता सुरु गरेका थिए । २०५२ देखि २०५४ सम्म उनले श्री सगरमाथा र एभरेष्ट हेराल्र्ड राष्ट्रिय दैनिक मार्फत पत्रकारिता गरे ।

२०५३ देखि २०५४ सम्म राउतले रेडियो नेपालमा संवाददाताका रुपमा काम गरे । त्यस्तै उनले ४ वर्ष राष्ट्रिय समाचार समितिमा पनि काम गरे । त्यसपछि उनले स्पेश टाइम राष्ट्रिय दैनिकमा खेलकुद व्यूरो प्रमुखका रुपमा काम गरे । २०५९ सालमा खेलकुद व्यूरो प्रमुखका रुपमा अन्नपूर्ण पोष्टमा प्रवेश गरेका राउत अहिले समाचार संयोजकका रुपमा कार्यरत छन् ।

दुई दशक भन्दा लामो खेलकुद पत्रकारितामा राउतसँग थाइल्यान्डमा भएको एसियाली खेलकुद (सन् १९९८), बंगलादेश र काठमाडौ.मा आयोजना भएको दक्षिण एसियाली खेलकुद (साग) , बंगलादेशमा भएको यू १९ क्रिकेट विश्वकप, मलेसियामा भएको एसीसी ट्रफीलगायतका अन्तर्राष्ट्रियमा समाचार संकलन गरेको अनुभव छ ।

आम सञ्चार तथा पत्रकारितामा स्नात्तकोत्तर गरेका ४८ वर्षे राउत खेलकुद पत्रकारहरुको छाता संगठन नेपाल खेलकुद पत्रकार मञ्चका पूर्व उपाध्यक्ष समेत हुन् ।