मध्यपुर (हाम्रो खेलकुद)– गल्फका सुवास तामाङ र कुस्तीकी संगिता धामी एनएनआइपिए स्पोर्टस अवार्डअन्तर्गत उदयीमान खेलाडी घोषित भएका छन् ।

राष्ट्रिय तथा अन्तर्राष्ट्रिय खेलाडी (एनएनआइपिए) ले शनिबार मध्यपुर थिमीमा १५ औं स्पोर्टस अवार्ड आयोजना गर्दै सुवास र संगितालाई उदयीमान खेलाडी चुनेको छ ।

गत वर्ष स्वदेशमा आयोजना भएको १३ औं दक्षिण एसियाली खेलकुद (साग) मा समावेश खेलका २६ खेलाडीलाई सम्बन्धित संघको सिफारिसमा उत्कृष्ट खेलाडीबाट सम्मानित गरेको हो । उत्कृष्ट खेलाडीको सुची यसअघि नै एनएनआइपिएले सार्वजनिक गरिसकेको थियो । तीनै उत्कृष्ट मध्येबाट उदीयमान खेलाडी छनोट गरिएको एनएनआइपिएले जनाएको छ ।

सुवासले १३ औं सागमा २ वटा स्वर्ण जितेका थिए । त्यस्तै, आठौं राष्ट्रिय खेलकुद प्रतियोगितामा आर्मीका सुवासले राहुल विक र निश्चयजंग राजमाझीसँग टिम इभेन्ट्समा रजत पदक जितेका थिए । उनी फाल्डो सिरिज छनोट २०७६ मा च्याम्पियन पनि हुन् ।

संगिताले १३ औं सागमा कुस्तीमा स्वर्ण पदक जितेकी थिइन् । ३७ वर्षे साग इतिहासमा कुस्तीमा नेपाललाई स्वर्ण पदक दिलाउने संगिता पहिलो खेलाडी हुन् ।

पुसमा पल्सर स्पोर्टस अवार्डमा सुवासले वर्षका उत्कृष्ट युवा खेलाडी अवार्ड जितेका थिए । पहिलो पटक समावेश उदीयमान खेलाडी सुवास र संगिताले स्काई फिटबाट प्रायोजित समान ५० हजार रुपैयाँ प्राप्त गरे ।

एनएनआइपिएका मानार्थ अध्यक्ष दीपक विष्टको संयोजकत्वमा रहेको छनोट समितिले प्रतिभावान खेलाडीको छनोट गरेको थियो ।