मध्यपुर (हाम्रो खेलकुद)– तेक्वान्दोकी आयशा शाक्य र फुटबलका सुजल श्रेष्ठ एनएनआईपिए स्पोर्टस अवार्डअन्तर्गत प्रतिभावान खेलाडी घोषित भएका छन् ।

राष्ट्रिय तथा अन्तर्राष्ट्रिय खेलाडी (एनएनआइपिए) ले शनिबार मध्यपुर थिमीमा १५ औं स्पोर्टस अवार्ड आयोजना गर्दै आयशा र सुजललाई प्रतिभावान खेलाडी घोषित गरेको हो ।

गत वर्ष स्वदेशमा आयोजना भएको १३ औं दक्षिण एसियाली खेलकुद (साग) मा समावेश खेलका २६ खेलाडीलाई सम्बन्धित संघको सिफारिसमा उत्कृष्ट खेलाडीबाट सम्मानित गरेको हो । उत्कृष्ट खेलाडीको सुची यसअघि नै एनएनआइपिएले सार्वजनिक गरिसकेको थियो । तीनै उत्कृष्ट मध्येबाट प्रतिभावान खेलाडी छनोट गरिएको एनएनआइपिएले जनाएको छ ।

१३ औं सागमा आयशाले दुई वटा स्वर्ण पदक जितेकी थिइन् । त्यस्तै, उनले आठौं राष्ट्रिय खेलकुदमा भने कास्य पदक जितेकी थिइन् । राष्ट्रिय फुटबल टोलीको सदस्य समेत रहेका सुजलको कप्तानीमा फुटबल टोलीले सागमा स्वर्ण पदक जितेको थियो ।

पुसमा आयोजना भएको पल्सर स्पोर्टस अवार्डमा आयशा स्पेशल अवार्डबाट सम्मानित भएकी थिइन् । उनले युवा तथा खेलकुद मन्त्रालयबाट प्रतिभा पुरस्कार प्राप्त गरेकी थिइन् ।आयशा र र सुजनले युएसए एभरेष्ट तेक्वान्दोले प्रोजना गरेको समान ५० हजार रुपैयाँ प्राप्त गरे ।

एनएनआइपिएका मानार्थ अध्यक्ष दीपक विष्टको संयोजकत्वमा रहेको छनोट समितिले प्रतिभावान खेलाडीको छनोट गरेको थियो ।