झरनालाई प्रदेश स्तरिय फुटबल उपाधि

विराटनगर (हाम्रो खेलकुद) – आयोजक मोरङको झरना युवा क्लबले प्रथम प्रदेश स्तरिय नकआउट फुटबल प्रतियोगिताको उपाधि जितेको छ । सुनसरीको धरान फुटबल एकेडेमीलाई सडन डेथमा हराउँदै झरना प्रदेश स्तरिय च्याम्पियन बनेको हो ।

सुन्दर हरैचामा सञ्चालित प्रतियोगिताको फाइनलमा निर्धारित समय १–१ बराबरीमा टुंगिएको थियो । टाइब्रेकरमा पनि बराबरी भएपछि खेल सडन डेथमा पुगेको थियो । जसमा झरना ५–४ ले विजयी भएको थियो ।

खेलमा लिएको अग्रता जोगाउन नसक्दा धरान उपाधि विमुख हुनुपरेको थियो । ६७ औं मिनेटमा तपन कार्कीको गोलमा धरानले अग्रता लिएको थियो । तर, ७४ औं मिनेटमा विजय भुजेलले झरनाका लागि बराबरी गोल फर्काएका थिए ।

टाइब्रेकरमा झनाका लागि निरज बस्नेत, साइमन्ड लिम्बु, निशान लिम्बु र मनोज राईले गोल गरे । निशान सुब्बाको प्रहारलाई विपक्षी गोलकिपरले रोकेका थिए भने दोर्जे तामाङको प्रहार बाहिरिउको थियो ।

धरानका लागि विवके राई, विनोद राई, विष्णु सुनुवार र फोफोना फोडेले गोल गरे । फोफोना इब्राहिम, साहिद र मन्दिप चाम्लिङको प्रहार सपल हुन सकेन । झरनाले उपाधिसहित १ लाख १ हजार १ सय ११ रुपैयाँ प्राप्त गरेको छ । प्रदेश १ का मुख्य मन्त्री शेरधन राईले विजेता, उपविजेता टोलीलाई पुरस्कृत गरे ।