धनगढी (हाम्रो खेलकुद) – धनगढीमा अर्को महिना आयोजना हुने दोस्रो कैलाली अस्पताल सुदूरपश्चिम स्पोर्टस अवार्डअन्तर्गत बिवाईसी पिपुल्स च्वाईस अवार्डको मनोनयन सार्वजनिक भएको छ ।

पिपुल्स च्वाईस अवार्डको मनोनयनमा पौडीकी गौरिका सिंह, क्रिकेटकी अन्जली चन्द र भलिबलकी सरस्वती चौधरी परेका छन् । गत वर्ष गरेको प्रदर्शन र लोकप्रियताको आधारमा खेलाडीको मनोनयन गरेको आयोजक नेपाल खेलकुद पत्रकार मञ्च कैलाली समन्वय शाखाले जनाएको छ ।

दोस्रो सुदूरपश्चिम स्पोर्टस अवार्डको मुख्य प्रायोजक कैलाली अस्पतालका अध्यक्ष जनकराज जोशी, लाईफटाईम अचिभमेन्ट अवार्ड विधा प्रायोजक सारथी अस्पतालका अध्यक्ष वेदप्रकाश जोशी र स्पेशल अवार्ड विधा प्रायोजक न्यु सिटी पोलि क्लिनिकका सञ्चालक भरत कुँवरले बुधबार मनोनयन सार्वजनिक गरे ।

सुदूरपश्चिम र मध्यपश्चिममा सर्वाधिक पुरस्कार राशीको फुटबल प्रतियोगिता आयोजना गर्ने वनदेवी युवा क्लबका अध्यक्ष सुसन जोशीले यो पिपुल्स च्वाईस अवार्डलाई प्रायोजन गरेको मञ्चले जनाएको छ ।
पिपुल्स च्वाई अवार्डको विजेताको घोषणा एसएमएस भोटिङ, फेसबुक लाइक तथा खेलकुद पत्रकार र प्रशिक्षकको मतको आधारमा गरिने बताएको छ । फेसबुकमा भोटका लागि सुदूरपश्चिम स्पोर्टस अवार्डको आधिकारिक पेजमा गएर लाईक गर्न सकिने मञ्चका महासचिव तथा अवार्डका संयोजक प्रदीप पाठकले पत्रकार सम्मेलनमा जानकारी दिए । अवार्डको फेसबुकमा गएर आफूलाई मनपर्ने खेलाडीको प्रोफाईलमा लाईक गर्ने सकिने व्यवस्था गरिएको छ ।

एसएमएस भोटिङका लागि मनोनयनमा परेका खेलाडीको कोड बनाईएको महासचिव पाठकले बताए । गौरीकालाई १, अन्जलीलाई २ र सरस्वतीलाई ३ नम्बर कोड दिइएको छ । मोबाईलको म्यासेज बक्समा गएर एसएसए टाइप गरेर एक स्पेसपछि १, २ वा ३ लेखेर ३८६८७ मा एसएमएस पठाउन सकिने बताइएको छ ।

भोटिङ लाईनबुधबार नै सुरु भएको र चैत ४ गते रात १२ः०० बजेसम्म खुला रहनेछ । एसएमएस भोटिङको मतभार ५०, फेसबुक लाइक २५ प्रतिशत तथा पत्रकार, प्रशिक्षकको मतभार २५ प्रतिशत रहनेछ बताइएको छ ।

स्पोर्टस अवार्डको मुख्य प्रायोजक धनगढीको कैलाली अस्पतालले गरेको छ । बर्ष पुरुष खेलाडीलाई नवजीवन अस्पताल, वर्ष महिला खेलाडीलाई नोभा अस्पताल, पिपुल च्वाईस अवार्डलाई वनदेवी युवा क्लबर बर्ष युवा खेलाडीलाई निसर्ग अस्पतालले प्रायोजन गरेको छ ।

त्यसैगरी स्पेशल अवार्डलाई न्यू सिटी पोलीक्लिनिक, लाईफटाईम एचिभमेन्ट अवार्डलाई सारथी अस्पताल, सुदूरपश्चिम आईकन पुरुषलाई माया मेट्रो अस्पताल र महिलालाई तिवारी मेडिसिनले प्रायोजन गरेका छन् । अवार्डको प्रवद्र्धकमा धनगढी उपमहानगरपालिका र सुदूरपश्चिम सरकारको सामाजिक विकास मन्त्रालय रहेको छ । धनगढीको ओम प्यालेस अवार्डको भेनु पार्टनर रहेको छ भने गुरुकुल सेक्युरिटीले पनि अवार्डलाई साथ दिएको जनाइएको छ ।

अवार्डमा वर्ष २०७६ मा गरेको प्रदर्शनका आधारमा उत्कृष्ट पुरुष खेलाडी, उत्कृष्ट महिला खेलाडी, उत्कृष्ट युवा खेलाडी, उत्कृष्ट प्रशिक्षक, उत्कृष्ट पारा खेलाडी र वर्षको उत्कृष्ट टिम तथा खेलकुदमा पु¥याएको विशेष योगदानको कदर स्वरुप स्पेसल अवार्ड, पूरा जीवन खेलकुदमा समर्पित गर्ने एक पाका खेलकर्मीलाई लाइफटाइम अचिभमेन्ट अवार्ड, पिपल्स च्वाइस अवार्ड गरी ९ विधामा खेलाडी तथा खेलकर्मीलाई पुरस्कृत गरिनेछ ।

अवार्डको उत्कृष्ट खेलाडी पुरुष र महिला, उत्कृष्ट प्रशिक्षक र पिपल्स च्वाइस अवार्ड गरी ४ विधाका विजेतालाई समान ३० हजार, वर्ष युवा खेलाडी, स्पेसल अवार्ड, लाईफ टाइम एचिभमेन्ट अवार्डका विजेतालाई समान २५ हजार रुपैयाँ सहित सम्मान गरिनेछ । त्यस्तै सुदूरपश्चिम आईकन महिला र पुरुष विधाका विजेतालाई समान २० हजार रुपैयाँसहित अवार्ड प्रदान गरिनेछ ।