पोखरा (हाम्रो खेलकुद) – गण्डकी प्रदेशका विभिन्न जिल्लामा नौं वटा खेलकुदका पूर्वाधार निर्माणका लागि राष्ट्रिय खेलकुद परिषद् (राखेप) ले स्थानिय उपभोक्ता समितिसँग झन्डै २ करोडको आइतबार सम्झौता गरेको छ ।

गण्डकी प्रदेश स्तरिय खेलकुद अभिमुखीकरण कार्यक्रमको क्रममा पोखरामा राखेप सदस्य सचिव रमेशकुमार सिलवाल र सम्बन्धित उपभोक्ता समितिबीच सम्झौता भएको हो ।

पोखराको जेष्ठ नागरिक बहुद्देश्य कभर्डहल निर्माणका लागि राखेपले ५० लाख उपलब्ध गराउने भएको छ । ५५ लाख ६३ हजार ८६ रुपयाँ ९० पैसा लाग्ने लागत इष्टिमेट रहेकोमा बाँकी रकम समितिले ब्यहोनुपर्ने सम्झौतामा उल्लेख रहेको राखेपले जनाएको छ ।

त्यस्तै लमजुङको राईनस नगरपालिका ६ स्थित गौलीटार रंगशाला निर्माणका लागि राखेपले ५० लाख उपलब्ध गराउने भएको छ । ५५ लाख ९२ हजार १ सय ६१ रुपयाँ पैसा ५१ लाग्ने लागत इष्टिमेट रहेकोमा बाँकी रकम समितिले ब्यहोनुपर्ने बताइएको छ ।

त्यस्तै राखेपले लमजुङ कभर्ड हल निर्माणका लागि १० लाख,म्याग्दीको बेनी रंगशाला निर्माणका लागि १० लाख,पर्वतको कुश्मा कभर्डहल निर्माणका लागि १० लाख,तनहुँको चिन्टुटार रंगशाला निर्माणका लागि १० लाख,म्याग्दीको बेनी नगरपालिका स्थित रत्नेचौर बहुद्देश्य खेलमैदानका लागि १० लाख,बाग्लुङमा मदन भण्डारी कभर्डह निर्माणका लागि १० लाख, र गोरखा रंगशाला स्तरउन्नतीका लागि १० लाख उपलब्ध गराउने भएको छ ।

सम्झौता अनुसार सम्बन्धित उपभोक्ता समितिले २०७८ बैशाख मसान्त भित्र निर्माण सम्पन्न गर्नुपर्ने राखेपले जनाएको छ । कार्यक्रममा राखेप सदस्यद्धय राजेश गुरुङ,रेनुका श्रेष्ठ,बिभागिय प्रमुखद्धय कुलवहादुर थापा,अर्जुन विकलगायतको उपस्थिति थियो ।