पोखरा (हाम्रो खेलकुद)– राष्ट्रिय खेलकुद परिषद् (राखेप) को आयोजनामा खेलकुद अभिमुखीकरण कार्यक्रम पोखरामा आइतबार बिहानै देखि चलिरहेको थियो । बिहानको करिब ११ बजेको समयमा कार्यक्रमको उद्घाटन सत्र राखिएको थियो ।

उद्घाटन समारोहमा राखेप सदस्य सचिव रमेशकुमार सिलवालसहित राखेपका दुई सदस्य गण्डकी प्रदेश राजेश गुरुङ र सम्पन्न श्रेष्ठ थिए । युवा तथा खेलकुद मन्त्रालयका प्रतिनिधी, अभिमुखीकरणका लागि आएका प्रशिक्षक लगायत गण्डकी प्रदेशमा रहेका जिल्लाहरुको प्रतिनिधित्व हुने नै भयो ।

राष्ट्रिय खेलकुद विकास ऐन २०७७ लागू भएपछि गठन भएको राखेपमा गण्डकीका गुरुङ र श्रेष्ठ सदस्य मानोनित भएका थिए । गुरुङ तेस्रो र श्रेष्ठ पहिलो पटक राखेप सदस्य भएका हुन् । सदस्य मनोनित भएयता उनी उनीबीच सम्बन्ध राम्रो नभएको प्रदेशमा चर्चाको विषय बन्दै आएको छ ।

उद्घाटनमा स्वागत मन्तव्य राख्दै राखेप सदस्य श्रेष्ठले पोखरामा पहिलोे पटक राम्रो कार्यक्रम आएको बताउँदै अन्तिममा ‘सक्नु हुन्छ अघि बढ्नुस सक्नु हुन्न रिस नगर्नुस’ भन्दै विदा भए । केहि समय पश्चात अर्का सदस्य गुरुङले आफ्नो भनाइ राख्ने क्रममा कार्यक्रमको बारेमा भन्दा बढि सदस्य श्रेष्ठ र पुर्व खेलकुद मन्त्री जगत विश्वकर्मामाथि निकै खेदो खने ।

गुरुङले १३ औं दक्षिण एसियाली खेलकुद (साग) आफ्नो पालामा आयोजना गरेको गरेको बताउँदै अघि नमस्कार गर्ने र पछाडि भने छुरी रोप्ने काम गरेको सुनाए । आक्रोशित हुदैँ गुरुङले ‘सक्नु हुन्छ भने अघि आएर नै गर्नुस् होइन भने पछाडि लाग्ने काम नगर्नुस । यहि मञ्चमा समेत हुनुहन्छ त्यसता व्यक्ति’ गुरुङले श्रेष्ठ प्रति शब्दको संकेत गरे ।

गुरुङले केहि व्यक्ति आफुलाई राखेप सदस्यबाट हटाउने खेल खेल्न खोजेको आरोप लगाए । ‘मलाई सदस्यबाट हटाउन समेत खोजियो । ३ पटक बोर्ड सदस्य भएको म कसले सक्छ हटाउन ? २–३ महिना बोर्ड सदस्य नरहँदा निकै खेल खेलेपनि केहि गर्न नसकेको उनको धारण थियो ।

एक खेलकुदकर्मीका अनुसार श्रेष्ठ र गुरुङ बिच खटपट चलिरहेको छ । सागमा ८ खेल पोखरामा आयोजना भएको थियो । पोखरामा आयोजना भएको सागका विषयमा पनि छानविनको तयारी भएपनि पछि रोकिएको चर्चा खेलकर्मीबीच हुने गरेको छ ।

अभिमुखीकरण कार्यक्रम

अभिमुखीकरण कार्यक्रममा गण्डकी प्रदेशका ११ जिल्ला खेलकुद विकास समितिका कार्यालय प्रमुख, ओलम्पियन, अन्तर्राष्ट्रिय पदक विजेता, भेट्रान खेलाडी र स्थानिय खेल संघका प्रतिनिधि गरी जम्मा १ सय ४९ जनाको सहभागिता रहेको छ ।

दुईदिने कार्यक्रमको उद्घाटन राखेप सदस्य सचिव सिलवालले गरेका थिए । सो अवसरमा युवा तथा खेलकुद मन्त्रालयका सह–सचिव भक्तबहादुर ढकाल, राखेपका सदस्यत्रय राजेश गुरुङ, सम्पन्न श्रेष्ठ र रेणुका श्रेष्ठ, प्रशासन विभाग प्रमुख कुलबहादुर थापा, तालिम तथा प्रशिक्षण केन्द्रका निर्देशक अर्जुन विकलगायतको उपस्थिति थियो ।

सदस्य–सचिव सिलवालले स्पोर्ट्स म्यानेजमेन्ट, डा. ज्ञानेन्द्रविक्रम शाहले स्पोर्ट्स मेडिसिन, १० औं सागअन्तर्गत करातेतर्फ एकल काताकी स्वर्णधारी सुलोचना सिजख्वाले स्पोर्ट्स साइकोलोजी, रमन नेपालीले स्पोर्ट्स मोटिभेसन, राजेन्द्ररत्न तुलाधरले कन्डिसनिङ एन्ड फिट्नेस र सकुना देनीले मेन्टल ट्रेनिङ एन्ड स्पोर्ट्स पर्फमेन्स बारे जानकारी दिए ।

प्रदेशस्तरीय अभिमुखीकरण कार्यक्रम पोखराको अन्तिम कार्यक्रम हो । बाँकी छ प्रदेशको खेलकुद अभिमुखीकरण कार्यक्रम सम्पन्न भइसकेको छ ।