काठामाडौं (हाम्रो खेलकुद) – कञ्चनपुरको महेन्द्रनगरमा जारी तेस्रो संस्करणको सहाना प्रधान स्मृती महिला हक्की प्रतियोगिता(२०७७ अन्तर्गत तेस्रो दिन शुक्रबार नेपाल आर्मी क्लब र प्रदेश २ विजयी भएका छन् ।

पहिलो खेलमा प्रदेश २ ले गण्डकीलाई १–० गोल अन्तरले पराजित गर्यो । ४३ औं मिनेटमा प्रदेश २ की कविता लामाले गरेको गोल खेलमा खेलमा निर्णाय बन्यो । अर्को खेलमा आर्मीले प्रदेश १ लाई ११ –० गोल अन्तरले हरायो ।

आर्मीको जितमा निलिमा पाण्डेले सर्वाधिक ४ गोल गरिन् । निलिमाले ७, २०, ३३ र ४५ औं मिनेटमा गोल गरेकी थिइन् । त्यस्तै माया चौधरीले ३ गोल गरिन् । मायाले ४, १७ र ३५ औं मिनेटमा गोल गरेकी थिइन् । सरस्वती चौधरीले २, अञ्जना चन्द ठकुरी र मञ्जु विष्ट समान १ गोल गरे ।

प्रतियोगिता फागुन २ गते सम्म चल्ने छ । प्रतियोगितामा नेपाल आर्मी क्लब, गण्डकी प्रदेश, सुदूरपश्चिम प्रदेश, प्रदेश १ र प्रदेश नम्बर २ रहेका छन् । बागमती, लुम्बिनी र कर्णाली प्रदेश भने प्रतियोगितामा सहभागि छैनन् । पाँच टोली सहभागी यस प्रतियोगिता राउन्ड रोविनको आधारमा हुने छ । जसबाट अंकको आधारमा प्रथम, दोस्रो र तेस्रो निर्धारण गरिने छ ।

आर्मी ३ खेलमा सबै जित्दै ९ अंकका साथ शीर्षस्थानमा छ । सुदूरपश्चिम प्रदेश ६ अंकका साथ दोस्रो स्थानमा छ । प्रदेश २ तीन खेलमा २ मा हार र १ मा जित सहित ३ अंक जोड्दै तेस्रो स्थानमा छ । प्रदेश १ र गण्डकी प्रदेश जित बिहिन हुँदै पुछारमा छन् । शनिबार पहिलो खेलमा प्रदेश एक र प्रदेश २ भिड्ने छन् । दोस्रो खेलमा सुदूरपश्चिम र गण्डकी प्रदेशबीच प्रतिस्पर्धा हुने छ ।