काठमाडौं (हाम्रो खेलकुद) – नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले आयोजना गर्ने एनएनआइपिए स्पोर्टस अवार्डको लागि प्लाजा होटल ग्रुपले दुई वर्षको लागि प्रायोजन गर्ने भएको छ ।

एनएनआइपिएले अवार्डमा सम्मानित हुने उपत्यका बाहिरबाट आउने खेलाडीलाई आवश्यक आतिथ्यता प्रदान गर्न आगामी दुई वर्षको लागि प्लाजा होटल ग्रुपसँग बिहीबार दुई वर्षको सम्झौता गरेको हो । सम्झौता पत्रमा प्लाजा होटल ग्रुपका प्रबन्ध निर्देशक युवराज श्रेष्ठ र एनएनआइपिएकाएका अध्यक्ष दीपक श्रेष्ठले हस्ताध्क्षर गरेका थिए ।

यसपटक एनएनआइपिए स्पोर्टस अवार्ड फागुन ८ गते मध्यपुर ठिमी नगरपालिकामा आयोजना हुँदै छ । मध्यपुर ठिमी नगरपालिका स्थानिय आयोजकका रुपमा रहने कार्यक्रमको सम्पूर्ण व्यवस्थापन मध्यपुर ठिमी नगरपालिकाले गर्नेछ । अवार्ड दुई पोखरीमा हुनेछ ।

अवार्डमा यसपटकदेखि राइजिङ प्लेयर अफ दि इयर अवार्ड विधा थप गरिएको छ । उक्त विधालाई स्काई ब्रान्ड नेपालले प्रायोजना गरेको छ । एक महिला र एक पुरुषलाई राइजिङ प्लेयर अवार्डबाट सम्मानित गरिनेछ । त्यसको पुरस्कार राशी समान ५० हजार रुपैयाँ रहनेछ ।

एनएनआइपिएको सर्वोत्कृष्ट महिला र पुरुष खेलाडीका लागि समान १ लाख रुपैयाँको पुरस्कार ग्लोबल आईएमई बैंकले प्रायोजन गर्दै आएको छ । त्यस्तै प्रतिभावान महिला र पुरुष खेलाडीका लागि समान ५० हजार रुपैयाँ युएसए एभरेष्ट तेक्वान्दोले प्रायोजन गर्दै आएको छ ।

अघिल्लो वर्षभर गरेको प्रदर्शनको आधारमा सम्बन्धित राष्ट्रिय संघले गरेको सिफारिसका आधारमा विभिन्न खेलका खेलाडीलाई एनएनआईपिए बर्षको उत्कृष्ट खेलाडी अवार्डबाट सम्मानित गरिदै आएको छ । ती उत्कृष्ट खेलाडीले सम्बन्धित संघ र एनएनआइपिएको सहकार्यमा समान १० हजार रुपैयाँ प्राप्त गर्नेछन् ।

यसपटकको अवार्डमा गत वर्ष स्वदेशमा आयोजना भएको १३ औं दक्षिण एसियाली खेलकुद (साग) मा समावेश भएका खेलाडी समेटिएको छ । सागमा समावेश २६ खेलका भविष्यमा उत्कृष्ट प्रदर्शन गर्ने सम्भावना देखिएका एक महिला र एक पुरुषलाई राइजिङ प्लेयर अफ दि इयर अवार्ड प्रदान गरिनेछ ।

सोही अवार्ड समारोहमा १ जनालाई खेलकर्मीलाई गजराज जोशी आदर्श खेलाडी र १ जना खेलकुद पत्रकार वा खेलकुद फोटो पत्रकार लाई एनएनआइपिए खेल पत्रकारिताबाट पुरस्कृत प्रदान गरिनेछ । संघको सिफारिसमा उत्कृष्ट घोषित हुने खेलाडीबाहेक अन्य विधाको विजेताका लागि एनएनआईपिएका मानार्थ अध्यक्ष दीपक विष्टको संयोजकत्वमा छनोट समितिले चयन गर्नेछ । समितिमा नेपाल खेलकुद पत्रकार मञ्चका प्रतिनिधि सदस्यका रुपमा रहेका छन् ।