पोखरा (हाम्रो खेलकुद) – टाइगर ग्रुप अफ पोखराको आयोजनामा मंगलबारदेखि आयोजना हुने टाइगर कप आमन्त्रण राष्ट्रिय महिला तथा पुरुष क्लब भलिबल प्रतियोगिताको खेल तालिका सार्वजनिक भएको छ ।

आयोजक टाइगर ग्रुप अफ पोखरा र टेक्निकल कमिटिले सोमबार खेल तालिका सार्वजनिक गरेको हो । सार्वजनिक तालिकाअनुसार पहिलो दिन मंगलबार महिलातर्फ नेपाल एपिएफ क्लब र नेपाल पुलिस क्लब तथा त्रिभुवन आर्मी क्लब र होङ्ग्वान्जी न्यु डायमन्ड स्पोर्ट्स क्लबबीच प्रतिस्पर्धा हुनेछ ।

दोस्रो दिन बुधबार पुलिस र आर्मीबीच प्रतिस्पर्धा हुनेछ । बिहीबार एपिएफ र आर्मी तथा पुलिस र न्यु डायमन्डबीच प्रतिस्पर्धा हुनेछ । शुक्रबार एपिएफ र न्यु डायमन्डबीच प्रतिस्पर्धा हुनेछ ।प्रतियोगिताको अन्तिम दिन शनिबार राउन्ड रोविन लिगमा शीर्ष दुई टोलीबीच उपाधि भिडन्त हुनेछ ।

यस्तै पुरुषतर्फ पहिलो दिन मंगलबार स्थानिय टोली गण्डकी प्रदेश र नेपाल पुलिस क्लबबीच उद्घाटन खेल हुनेछ । बुधबार गण्डकी प्रदेश र त्रिभुवन आर्मी क्लब तथा नेपाल पुलिस क्लब र एपिएफबीच खेल हुनेछ ।

बिहीबार आर्मी र एपिएफबीच खेल हुनेछ । शुक्रबार गण्डकी प्रदेश र एपिएफ तथा पुलिस र आर्मीबीच प्रतिस्पर्धा हुनेछ । प्रतियोगिताको अन्तिम दिन राउन्ड रोविन लिगको शीर्ष दुईमा रहने टोलीबीच उपाधि भिडन्त हुनेछ ।

राउन्ड रोविनको आधारमा खेलाइने प्रतियोगितामा पुरुषतर्फ चार र महिलातर्फ चार टिमको सहभागिता रहनेछ । महिलातर्फ सशस्त्र प्रहरी बल, त्रिभुवन आर्मी क्लब, नेपाल प्रहरी र न्यु डायमण्ड एकेडेमीको सहभागिता छ ।

पुरुषतर्फ सशस्त्र प्रहरी बल,त्रिभुवन आर्मी क्ल्ब, नेपाल प्रहरी र गण्डकी प्रदेश रहेका छन् । प्रतियोगिताको विजेताले समान एक लाख ५० हजार तथा उपविजेताले समान ७५ हजार प्राप्त गर्नेछन् ।

तेस्रो हुनेले समान ३५–३५ हजार रुपैयाँको साथमा ट्रफी, मेडल र प्रमाणपत्र प्राप्त गर्नेछन । प्रतियोगिताको सान्त्वना टिमले १५ हजार रुपैयाँ प्राप्त गर्नेछन् । त्यस्तै सर्वोत्कृष्ट खेलाडीले २० हजार तथा उत्कृष्ट सर्भर, सेटर, ब्लकर, डिफेन्डर र स्पाइकरले समान ५–५ हजार रुपैयाँ प्राप्त गर्नेछन् ।

प्रतियोगिताको सबै खेलको प्रत्यक्ष प्रसारण हाम्रो खेलकुद डट कमले गर्दैछ ।