पोखरा (हाम्रो खेलकुद) – पोखरामा अर्को साता सुरु हुने प्रथम टाइगर कप आमन्त्रण राष्ट्रिय भलिबल च्याम्पियनसिपका लागि गण्डकी प्रदेशले आफ्नो टोलीको घोषणा गरेको छ ।

आयोजक टाइगर ग्रुप अफ पोखरा, नेपालले ३ वैकल्पिक सहित १५ सदस्यीय टोलीको घोषणा गरेको हो । प्रतियोगिताका संयोजक नविन गुरुङका अनुसार हरि पाण्डेको कप्तानीमा प्रदेश टोली घोषणा गरिएको छ ।

टोलीको ओपन स्पाइकरतर्फ घनश्याम चौधरी (नवलपुर), किरण गुराउ (नवलपुर), इश्वर थापा (स्याङजा) र सञ्जय परियार (पर्वत) छन् । क्विक स्पाइकरतर्फ राजु विक (वागलुङ), याम क्षेत्री (कास्की) र रुपेन्द्र गैरे (पर्वत) छन् ।

त्यस्तै अलराउण्डरतर्फ हरि पाण्डे (स्याङजा) र सन्तोष थापा (स्याङजा) तत्थ सेटरतर्फ सूजन चोखाल (म्याग्दी) तथा ठग वहादुर गुरुङ (स्याङजा) छन् । लिव्रोतर्फ राजन दर्लामी मगर (स्याङजा) छन् । वैकल्पिकमा सफल बिक (कास्की), विवश थापा (कास्की) र मनोज खड्का (कास्की) छन् । प्रशिक्षकमा रमेश केसी छन् ।

राउन्ड रोविनका आधारमा हुने च्याम्पियनसिपमा महिला र पुरुषतर्फ समान ४ टोलीको सहभागिता रहने आयोजकले यसअघि नै बताइसकेका छन् । तीन विभागिय टोली नेपाल प्रहरी, त्रिभुवन आर्मी क्लब र नेपाल एपिएफ क्लब दुवैतर्फ सहभागी छन् । महिलातर्फ होगान्जी न्यू डायमण्ड स्पोर्टस् क्लब र पुरुषमा गण्डकी चौथो टोलीका रुपमा रहेका छन् ।

च्याम्पियनसिपको दुवै तर्फको विजेताले समान १ लाख ५० हजार, दोस्रो टोलीले ७५ हजार र तेस्रो टोलीले समान २५ हजार रुपैयाँ प्राप्त गर्नेछन् । दुवै तर्फका सर्वोत्कृष्ट खेलाडीले समान २० हजार रुपैयाँ प्राप्त गर्नेछन् । दुवैतर्फ उत्कृष्ट सर्भर, सेटर, ब्लकर, डिफेण्डर तथा स्पाइकरले समान ५ हजार रुपैयाँ प्राप्त गर्नेछन् ।

झन्डै २५ लाख रुपैयाँ खर्च हुने प्रतियोगितबाट ३० लाख रुपैयाँ वचतको अनुमान गरिएको टाइगर ग्रुपका अध्यक्ष नारायण प्रसाद शर्माले बताए । प्रतियोगिताबाट बचेको रकम सामाजिक, खेल क्षेत्र र खेलाडीको सहयोगका लागि खर्च गरिने उनले बताए ।

प्रतियोगितामा पहिलो चरणको खेलका लागि टिकट दर १ सय, तेस्रो स्थानको खेलका लागि १ सय ५० र फाइनल खेलका लागि २ सय रुपैयाँ प्रवेश शुल्क तोकिएको छ । हाम्रो खेलकुद डटकमले प्रतियोगिताको प्रत्यक्ष प्रसारण गर्नेछ ।