काठमाडौं (हाम्रो खेलकुद)– कराते खेल विकासमा आ आफ्नो क्षेत्रबा महत्वपूर्ण भूमिका निर्वाह गर्ने ३ व्यक्तित्वलाई नेपाल कराते महासंघ ललितपुरले सोमबार सम्मान गरेको छ ।

महासंघले ललितपुर महानगरपालिकाका मेयर चिरिबाबू महर्जन, राष्ट्रिय खेलकुद परिषद् (राखेप) का करातेका मुख्य प्रशिक्षक हिरासिंह डंगोल र नेपाल उद्योग बाणिज्य महासंघ ललितपुरका अध्यक्ष मनोजबहादुर न्याछ्योलाई सम्मान गरेको हो । नेपाली कांग्रेसका ललितपुर जिल्ला सभापति एवंम संविधान सभा सदस्य मदनबहादुर आमात्यले तीनै जनलाई सम्मान पत्र प्रदान गरे ।

लगनखेल डोजोमा आयोजित कार्यक्रममा कराते विकासमा महानगरका तर्फबाट विशेष सहयोग हुँदै आएकोमा महर्जनलाई सम्मान गरिएको बताइएको छ । आठौं दक्षिण एसियाली खेलकुद (साग) सहित विभिन्न अन्तर्राष्ट्रिय प्रतियोगितामा राष्ट्रिय कराते टोलीको प्रशिक्षकको भूमिका निर्वाह गरेका डंगोललाई केहि साता अघि मात्र राखेपले मुख्य प्रशिक्षकको जिम्मेवारी दिएको थियो । उनले करातेमा पुर्याएको योगदानका लागि सम्मान गरिएको बताइएको छ ।

त्यस्तो लगनखेल डोजोको प्रशिक्षक समेत रहिसकेका न्याछ्यो हालै मात्र ललितपुर उद्योग वाणिज्य महासंघको अध्यक्षमा निर्वाचित भएका थिए । सम्मान पछि मेयर महर्जनले आउने दिनमा पनि महानगरपालिकाले कराते खेल विकासका लागि सक्दो सहयोग गर्ने वचन दिए । करातेका मुख्य प्रशिक्षक डंगोलले करातेमा पनि एकेडेमी सुरु गर्न आवश्यकता रहेकोले आफूले राखेपमा सोहि अनुसार एकेडेमी सञ्चालनका लागि प्रस्ताव पेश गरेको जानकारी दिए ।

न्याछ्योले अहिले फरक क्षेत्रमा रहेपनि सधै कराते खेलाडी भन्नेमा गर्व लाग्ने र आफूले सकेको सहयो गर्ने वचन दिए । उनले सन् १९८९ मा सिंगापुरमा आयोजना भएको पाँचौं एसियन कराते च्याम्पियनसिपमा कास्य पदक जितेका थिए ।

सो अवसरमा नेपाली कांग्रेसको खेलकुद विभागका सचिव मीनकृष्ण महर्जन, राखेप सदस्य पुरेन्द्रविक्रम लाखे, पूर्व खेलाडी वीरेन्द्र महर्जन, राष्ट्रिय तथा अन्तर्राष्ट्रिय खेलाडी संघका अध्यक्ष समेत रहेका सागको आठौं र नवौं सागका स्वर्ण पदक विजेता दीपकले श्रेष्ठले कराते विकासमा ललितपुर र लगनखेल डोजोको योगदानको चर्चा गरेका थिए ।

ललितपुर कराते महासंघका अध्यक्ष सानुलाल श्रेष्ठको सभापतित्वमा सम्पन्न कार्यक्रमलाई आठौं सागका स्वर्ण पदक विजेता रवि महर्जन र लगनखेल डोजोका महासचिव विनोद महर्जनले सह संयोजन गरेका थिए ।