रेसिङ गाँउपालिकामा म्याराथन हुँदै

काठमाडौं (हाम्रो खेलकुद)– पर्यटन प्रर्बद्धन गर्न तनहुँको रेसिङ गाँउपालिका अर्का साता म्याराथन आयोजना गर्ने भएको छ । म्याराथन सोमबार आयोजना हुने बताइएको छ ।

गाँउपालिका भित्रका पर्यटकिय गन्तव्यको प्रर्बद्धन गर्न म्याराथन आयोजना गरेको गाँउपालिका अध्यक्ष राजेन्द्रकृष्ण श्रेष्ठ बताए । उनले भने, ‘अब हामी खेलकुदमार्फत गाँउलाई चिनाउन प्रयास गर्दैछौं । रिसिङ पर्यटकीय सम्भावना बोकेको धेरै गन्तवय छन्। तर, प्रचारप्रसार अभावमा आझेलमा परेका छन् । त्यसैले म्याराथनको माध्यमबाट तीनै गन्तव्यको प्रबद्र्धनमा जुटेका हौ ।’

खुला म्याराथन, महिला प्रतिस्पर्धा र स्थानियहरुका लागि अलगै विधामा दौड हुने बताइएको छ । रिसिङको गढीडाँडाबाट सुरु हुने दौड, रानीपोखरी, गाउँपालिकाको कार्यालय, पोखरीभज्याङ, गोठादी, चालिसे, भिरकोट, अर्चल्दी, मौरीबास, दाङसिरी, दुवुङ भ्यूवटावरमा पुगेर सम्पन्न हुने बताइएको छ ।

म्याराथनको विजेताले ६५ हजार, दोस्रो हुनेले ४० र तेस्रो हुनेले २५ हजार रुपैयाँ प्राप्त गर्नेछन् । ३ जनाले सान्त्वना पुरस्कारका रुपमा १० हजार रुपैयाँ प्राप्त गर्ने अध्यक्ष श्रेष्ठले बताए ।