मनोरञ्जन शर्मा, भैरहवा

भारतको नागपुरमा हुने पावर लिफ्टिङको अन्तर्राष्ट्रिय प्रतियोगिता भाग लिन ५ खेलाडीको नेपाली टोली त्यसतर्फ प्रस्थान गरेको छ ।

नागपुरको मंसिर १८ देखि २२ गते सम्म हुने प्रतियोगितामा १ महिला र ४ पुरुष गरि ५ खेलाडीले प्रतिस्पर्धा गर्नेछन् । प्रतियोगिता एमेच्योर पावर लिफ्टिङ फेडेरेसन अफ ईण्डियाको आयोजना सञ्चालन हुने बताइएको छ ।

प्रतियोगितामा महिला तर्फ ५५ केजी तौल समूहमा सुर्खेतकी श्रुती कार्कीले ,पुरुष खेलाडीतर्फ कास्कीका सुजन आलेमगरले ७५ केजी, स्याङ्जाका हसन गुरुङले ८० केजी, भक्तपुरका राजेश सुवाल ९० केजी र कास्कीका आशिष आलेले सय केजी तौल समूहमा प्रतिस्पर्धा गर्ने बताइएको छ ।

एसिया पावर लिफ्टिङ फेडेरेसन का उपाध्यक्ष जीवन गिरि र अन्तर्राष्ट्रिय पावर लिफ्टिङ संघका उपाध्यक्ष केदारमान स्थापित पनि टोलीसँगै भारत प्रस्थान गरेका छन् । टोलीका नेता समेत रहेका स्थापितले विभिन्न जिल्लामा आन्तरिक रुपमा छनोट गरि पहिलो पटक प्रतियोगितामा सहभागी गराउन लागेको बताए ।

कोरोना संक्रमण र जोखिमकाबीचमा पनि नियमित प्रशिक्षण भइरहेको र पदकको अपेक्षा गरिएको टोलीका प्रशिक्षक समेत रहेका गिरिले बताए । भैरहवा भंसार कार्यालयका कार्यबाहक प्रमुख बलराम भण्डारी, जापान गोजूरियो कराते डोका अध्यक्ष काजी राना, शारीरिक सुगठन तथा फिटनेस संघका केन्द्रीय सदस्य शिवध्वज राई देवान, लुम्बिनी खुकुरी क्लबका अध्यक्ष राम बहादुर बस्नेत, फिटनेस तथा जिम व्यवसायी संघ रुपन्देहीका अध्यक्ष विजेन्द्रमान श्रेष्ठलगायतले टोलीलाई विदाई गरेका थिए ।