काठमाडौं (हाम्रो खेलकुद) – राष्ट्रिय खेलकुद परिषद् (राखेप) का नवनियुक्त ११ बोर्ड सदस्यले सोमबार शपथ ग्रहण लिएका छन् । राखेपका अध्यक्ष समेत रहेका युवा तथा खेलकुद मन्त्री जगतबहादुर सुनार (विश्वकर्मा)ले त्रिपुरेश्वरस्थित राखेपमा बोर्ड सदस्यलाई पद तथा गोपनीयताको शपथ ग्रहण गराए ।

मन्त्रीपरिषद्को असोज २९ गतेको बैठकले हरि खड्का, मानदेव हजरा, पुरेन्द्रविक्रम लाखे, राजेश गुरुङ, मोहम्मद सागिर शेख, नन्दा बस्याल, एकेन्द्र कुँवर, चन्द्रबदना राई र सुमित्रा चौधरीलाई बोर्ड सदस्यमा नियुक्त गरेको थियो ।

त्यस्तै मन्त्री विश्वकर्माले राष्ट्रिय खेलकुद संघको सिफारिसमा रेणुका श्रेष्ठ तथा सुवर्णाकेशरी श्रेष्ठलाई मनोनित गरेका थिए । राखेप बोर्ड ३७ सदस्यीय रहनेछ । यसअघि राखेप उपाध्यक्ष, सदस्य सचिव र ६ सदस्य नियुक्त भएका थिए । बाँकी सदस्य विभिन्न निकायबाट पदेन रहनेछन् ।

कार्यक्रमलाई सम्बोधन गर्दै मन्त्री विश्वकर्माले नवनियुक्त सदस्यहरु कुनै न कुनै भूमिकामा खेल क्षेत्रसंग सम्बन्धित भएकाले खेल क्षेत्रले नयाँ उचाइ लिने विश्वास व्यक्त गर्दै नयाँ पुस्तालाई खेल क्षेत्रमा आकर्षित गर्न उहाँहरुको योगदान महत्वपूर्ण हुने बताए ।

राखेपमा अब ७ सदस्यीय कार्यकारी समितिले पुर्णता पाउँन बाँकी छ । जसमा ७ जना रहने व्यवस्था छ । समितिमा सदस्य सचिव संयोजक र राखेपका विभागिय प्रशासन विभाग प्रमुख सचिव रहने व्यवस्था छ ।

मन्त्रालयका खेलकुद शाखाका प्रमुख पदेन सदस्य रहने व्यवस्था छ । अब २ महिला र २ पुरुषको कार्यकारी समितिमा नियुक्ती हुनेछ । बोर्ड सदस्यमध्येबाट मन्त्रीले १ महिला र १ पुरुष तथा बोर्डले १ महिला तथा एक पुरुष मनोनित गर्ने व्यवस्था छ ।

उद्घाटनका अवसरमा डिएन घिसिङद्वारा लिखित खेल जीत मनोविज्ञान पुस्तकको पनि मन्त्री विश्वकर्माले विमोचन गरेका थिए । शपथपछि मन्त्री विश्वकर्माले राखेपका उपाध्यक्ष शिव कोइराला, सदस्य–सचिव रमेशकुमार सिलवाललगायतका पदाधिकारीको उपस्थितिमा नवनियुक्त सदस्यहरुसंग छलफल गरेका थिए ।