सागकी स्वर्ण विजेता सुनितालाई पुत्र लाभ

काठमाडौं (हाम्रो खेलकुद)– १३ औं दक्षिण एसियाली खेलकुद (साग) की स्वर्ण पदक विजेता करातेकी सुनिता महर्जनलाई पुत्र लाभ भएको छ । थापाथलीस्थित प्रसुती गृहमा शुक्रबार दिउँसो १ः२० बजे छोरालाई जन्म दिएकी थिइन् ।

काठमाडौं बाफलका सुनिता र सुहिल महर्जनको जोडीको यो पहिलो सन्तान हो । उनीहरुको २०७३ सालमा विवाह भएको थियो । बच्चाको अवस्था सामान्य रहेको र आफुलाई भने केहि कठिन भएको सुनिताले बताइन् ।

गत वर्ष स्वदेशमा आयोजना भएको १३ औं सागको करातेमा ६८ केजी मूनीको तौल समूहमा सुनिताले स्वर्ण पदक जितेकी थिइन् । खेल जीवन र व्यक्तिगत जीवनमा सोचे जस्तै भएकोले अत्यन्तै खुसी लागेको बताइन् ।

‘स्वदेशमा साग आयोजना हुँदा स्वर्ण पदक जिते । ओलम्पिक छनोटमा पर्ने सम्भावना थिएन,’ उनले भनिन्, ‘त्यसपछि फेमेली प्लान थियो । विवाह भएको पनि लामो समय भइसकेको थियो । सोचे जस्तै भयो, खुसी छु ।’