काठमाडौं (हाम्रो खेलकुद) – नेपाल तेक्वान्दो संघ, पारा कमिटिको अन्तर्गतका प्रशिक्षक कविराज नेगी लामा, आयशा शाक्य र विकेश विडारीले इन्टरनेसनल कोच सर्टिफिकेट लाइसेन्स लिन सफल भएका छन् ।

विश्व तेक्वान्दो महासंघको आयोजनामा २ देखि ४ अक्टोबरसम्म सञ्चालन भएकोे चौथो वल्ड पारा तेक्वान्दो अनलाइन इन्टरनेसनल कोच सर्टिफिकेसन कोर्स (लेभल वान) मा उनी इन्टरनेसनल कोच सर्टिफिकेट लाइसेन्स लिन सफल भएका हुन् ।

कोर्षमा पारा तेक्वान्दोको इतिहास, कोच एडमिनिट्रेसन बाई लज, वर्गिकारण, कम्पिटिसनका नियाम, सेफ गार्डिङ, बायोलोजिकल एस्पेक्ट्स, खेल व्यवस्थापन, एन्टी डोपिङ, कोड अफ इथिक्स, पिएसएस, मनोवैज्ञानिक प्रभावको बारेका अध्ययन गराइएको लामाले जानकारी दिए ।

अनलाइन क्लास तथा प्रशिक्षण विश्व तेक्वान्दो संघको पारा समिटिको पारा गेम्सका प्रमुख डब्लुटी (इडुकेटर) उस्मान दिलदार, चकिर चेल्वाटले सञ्चालन गरेका थिए । कोर्षपछि १०० पुर्णाङ्क परिक्षा लिइएको थियो । जसमा नेपाली तीनै प्रशिक्षकले शतप्रतिशत अंक ल्याएर परिक्षा उत्र्तिण गरेको लामाले बताए । ७० प्रतिशत अंक ल्याएपनि उत्र्तिण हुने व्यवस्था थियो ।

प्रशिक्षक लामाले सन् २०१६ मा दक्षिण कोरियाको मुजुमा भएको डब्लुटिएफ पार्टनरसिप तेक्वान्दो कार्यक्रमको पारा कोर्समा पनि सहभागिता जनाएका थिए । उनी नेपाली पारा तेक्वान्दो टोलीका प्रशिक्षक हुन् ।

१३ औं दक्षिण एसियाली खेलकुद सागकी दोहोरो स्वर्ण पदक विजेता आयशाले आइतबार इन्टरनेसन अनलाइन पुम्से च्याम्पियनसिपमा स्वर्ण पदक जितेकी थिइन् । आयशा राष्ट्रिय खेलकुद परिषद्की सहायक प्रशिक्षक समेत हुन् ।