काठमाडौं (हाम्रो खेलकुद) – नेपाल ओलम्पिक कमिटी (एनओसी) का महासचिव निलेन्द्रराज श्रेष्ठसहित एनओसीका ४ जना कोराना भाइरस कोभिड–१९ संक्रमणमुक्त भएका छन् ।

एनओसीको शनिबार बसेको भर्चुअल बैठकमा महासचिव श्रेष्ठ र ३ जना कर्मचारी कोरोना मुक्त भएको जानकारी गराइएको थियो । साउन तेस्रो साता नै एनओसीका २ कर्मचारीलाई कोरोना संक्रमणको पुष्टी भएको थियो ।

अर्को पटकको परिक्षणमा महासचिव श्रेष्ठ र अर्का एक कर्मचारीलाई संक्रमण देखिएको थियो । संक्रमण भएपनि तीनै जनालाई कोभिड १९ को लक्षण भने देखिएको थिएन ।

यसैबीच, एनओसीले सबै ओलम्पियनको कोरोना बीमा गरिदिने भएको छ । भर्चुअल बैठकले ओलम्पिकमा भाग लिने सबै नेपाली खेलाडीको कारोना बीमा गर्ने निर्णय गरेको एनओसीले विज्ञप्तीमार्फत जनाएको छ ।

यस्तै बैठकले ओलम्पियनसँगै ओलम्पिकको तयारी गरिरहेका खेलाडी र प्रशिक्षक, ओलम्पिक कमिटिकी पदाधिकारी, एनओसी कमिसनका सदस्य तथा सबै कर्मचारीको समेत कोरोना बिमा गर्ने निर्णय गरेको छ । यस्तै बैठकले कोरोना संक्रमित ओलम्पियन जितबहादुर केसीलाई स्वास्थ्यलाभको कामना गरेको छ । केसी पनि कोरोना संक्रमण भएको छ ।

बैठकले एनओसीको मेडिकल कमिसनका अध्यक्ष डाक्टर सरोज कृष्ण श्रेष्ठलाई संघको कार्यालय संचालनका लागि नयाँ सुरक्षा प्रोटोकल तयार गर्न निर्देशन दिदै सबैलाई डब्लुएचओ र नेपाल सरकारले दिएको नियमलाई पालना गर्न आग्रह गरेको छ ।