पोखरा (हाम्रो खेलकुद) – नेपाल ह्याण्डबल संघले खेलाडी, प्रशिक्षक तथा रेफ्रिहरु गरि करिव २ सय जनाकोे कोरोना बीमा गर्ने भएको छ । विश्वव्यापी रुपमा कोरोनाको महामारी वढ्दै गएपछि संघले आफ्ना खेलाडी, प्रशिक्षक तथा रेफ्रिहरुको कोरोना बीमा गर्ने भएको हो ।

संघको बैठकको निर्णय सार्वजनिक गर्दै अध्यक्ष तेज गुरुङले भने,’ हाल सम्म नेपालको प्रतिनिधित्व गर्दै कुनै पनि अन्तर्राष्ट्रिय प्रतियोगितामा खेलेका सिनियर तथा जुनियर खेलाडी, प्रशिक्षक र रेफ्रीहरुको बीमा गर्ने भएका छौं ।’

वहालवाला वा अवकास प्राप्त प्रशिक्षक तथा राष्ट्रिय प्रतियोगितामा रेफ्रीको भूमिका निर्वाह गर्ने सबैको कोरोना बीमा गरिने संघका महासचिव सन्देश रेगमीले बताए । संघले कोरोनाको कारण कुनै पनि ह्याण्डबल खेलाडीको परवारमा आर्थिक समस्या परेको अवस्थामा गर्ने समेत भएको संघका उपाध्यक्ष जयन्त शर्माले बताए ।

‘लामो समय देखि वन्दा वन्दी भएका कारण खेलाडीहरु आर्थिक समस्या परेको हुन सक्छन,’ उनले भने,’ यस्तोमा खेलाडीको मनोबल घट्न नदिएका लागि सहयोग गर्ने भएका हौं ।’ बैठकले सबै खेलाडीको अवस्था वारे तत्काल जानकारी गराउन जिल्ला संघहरुलाई आह्वान समेत गरेको छ ।

यसै गरि अन्तर्राष्ट्रिय ह्याण्डबल महासंघ (आइएचएफ) बाट संघलाई कोभिड १९ सँग सम्वन्धित सहयोग गर्ने ६ हजार स्विस फ्रयान्क खर्च गर्नका लागि कार्यविधी बनाउने समेत भएको छ । कार्यविधी तयार गर्न संघका उपाध्यक्ष एवम गण्डकी प्रदेशका सांसद मोहन रेग्मीको संयोजकत्वमा ५ सदस्यीय समिती गठन गरिएको छ ।

समितिको सदस्यमा उपाध्यक्ष जयन्त शर्मा, महासचिब सन्देश रेग्मी, सचिव द्वय केशव पाठक र रत्नज्योती मानन्धर छन । उपाध्यक्ष रेग्मीले समितिले एक साता भित्र कार्यविधी तयार गरि आइएचएफबाट प्राप्त रकम ह्याण्डबल खेलको विकास सँगै कोरोनाका कारण समस्यामा रहेका खेलाडीलाई सहयोगका लागि खर्च गरिने बताएका छन् ।