काठमाडौं (हाम्रो खेलकुद) – राष्ट्रिय खेलकुद विकास ऐन २०७७ लागु भएपछि गठन भएको राष्ट्रिय खेलकुद परिषद् (राखेप) ले आफ्नै मातहतमा भएका काममा आर्थिक अनियमितता भएको भन्ने आरोपको छानविनका लागि समिति गठन गरेको छ ।

राखेपले बोर्डका सदस्य गोविन्द भट्टराईको संयोजकत्वमा ५ सदस्य छानविन उपसमिति गठन गरेको छ । राखेप सदस्य सचिव रमेशकुमार सिलवालले बुधबार भट्टराईलाई संयोजकको पत्र हस्तान्तरण गर्नु भयो ।

उपसमितिको सदस्यमा राखेप तालिम तथा प्रशिक्षण विभागका प्रमुख अर्जनवहादुर विक, राष्ट्रिय टिम तयारीका प्रमुख महेन्द्रकुमार राई,कानुन शाखा प्रमुख नारायण अर्याल र लेख अधिकृत पासङ फिजिङ शेर्पा छन् ।

उप समितिले १३ औं दक्षिण एसियाली खेलकुद (साग) अन्तर्गत ब्याडमिन्टन खेलका नेपाली खेलाडीले जुत्ता नपाएको,खेल पोशाक र खेल सामाग्री गुणस्तर नभएको भन्ने आरोप नेपाल ब्याडमिन्टन संघका उपाध्यक्ष सुभाष श्रेष्ठले लगाएका थिए । श्रेष्ठ पनि राखेप बोर्ड सदस्य छन् ।

सागमा ब्याडमिन्टनमा सहभागी खेलाडीलाई दिने समानमा अनियमिति भएको भन्ने सञ्चार प्रकाशित भएपछि युवा तथा खेलकुद मन्त्री जगतबहादुर सुनार (विश्वकर्मा) ले छानविन प्रक्रिया अघि बढाउन राखेप सदस्य सचिव सिलवाललाई निर्देशन दिएका थिए । त्यसै निर्देशन अनुसार सिलवालले उप समिति बनाएर २१ दिन भित्र प्रतिवेदन बुझाउन भनेको छ ।

राखेपले उप समितिलाई सातदोबाटो स्थित अन्तराष्ट्रिय खेल परिसरमा गत महिना रुख कटान गरिएको सम्बन्धमा पनि छानबिन गरि प्रतिवेदन बुझाउन जिम्मवोरी दिएको छ ।