पल्सर अवार्ड आयोजनाको तयारी सुरु

काठमाडौं (हाम्रो खेलकुद)– नेपाल खेलकुद पत्रकार मञ्च (एनएसजेएफ) ले वर्षेनी आयोजना गर्दै आएको पल्सर स्पोट्र्स अवार्ड यो वर्ष पनि आयोजना गर्ने तयारी थालेको छ ।

मञ्चको मंगलबार बसेको भर्चुअल बैठकले यस वर्षको अवार्ड असोज अन्तिमसम्ममा आयोजना गर्ने तयारी थालिएको निर्णय गरेको हो । हरेक वर्ष असार वा साउनमा हुदै आएको अवार्ड कार्यक्रम यसपटक विश्वव्यापी बनेको कोरोना भाइरस कोभिड–१९ को कारण सोही समयमा हुन सम्भावना नरहेपछि मञ्चले असोज अन्तिम सातासम्ममा अवार्ड आयोजना गर्ने निर्णय गरेको हो ।

कोरोना त्रासका कारण यसपटकको अवार्ड भर्चुअल माध्यमबाट हुनेछ । मञ्चले हरेक वर्ष विभिन्न विधामा सिंगो नेपाली खेल जगतलाई नै पुरस्कृत गर्दै आइरहेको छ । बैठकले अवार्डका लागि ६ वटा समिति गठन गरेको छ ।

खेलाडी छनोट समितिको संयोजकमा मञ्चका सचिव गोविन्द रेग्मी छन् । समारोह समितिमा उपाध्यक्ष निरन्जन अधिकारी, सचिवालय समितिमा उपाध्यक्ष ध्रुव तुलाधर, आर्थिक समितिमा कोषाध्यक्ष अन्जन खड्का, प्रचार प्रसारमा प्रवक्ता तथा सदस्य हिमबिक्रम केसी र व्यवस्थापन समितिमा सदस्य सुजन श्रेष्ठलाई संयोजक तोकिएको छ ।

त्यस्तै बैठकले एनएसजेएफ एकेडेमीले तयार पारेको वार्षिक क्यालेन्डरलाई स्वीकृत गरेको छ ।