काठमाडौं (हाम्रो खेलकुद) – नेत्रहिन क्रिकेट संघले आफ्नो १५औं बार्षिकोत्सवको अवसरमा नेत्रहीन क्रिकेटको विकासमा महत्त्वपुर्ण योगदान तथा उत्कृष्ट खेल प्रदर्शन आफ्ना तीन खेलाडीलाई ‘ज्योति केसी नेत्रहीन महिला क्रिकेट खेलाडी प्रतिभा पुरस्कार’बाट सम्मानित गरेको छ ।

ज्योति केसीले संघको लागि स्थापना गरेको १ लाख १० हजार रुपैयाको अक्षय कोसबाट आउने वार्षिक व्याजबाट खेलाडीलाई सम्मान गरेकी हुन् ।

संघले बी–थ्री समूहबाट कप्तान भगवती भट्टराई बराल, बी–टु समूहबाट मनकेशी चौधरी र बी–वान समूहबाट आशा रेग्मी लाई प्रतिभा पुरस्कार र जनही ५ हजार रुपैयाँबाट सम्मान गरेको हो ।

भगवती विगत १४ वर्षदेखि नेत्रहिन क्रिकेटमा संलग्न छिन् । २०१४ मा इंग्ल्यान्डविरुद्धको सिरिज र २०१९ मा पाकिस्तानविरुद्धको सिरिजमा कप्तानको भूमिका निर्वाह गर्दै दुवै खेलमा नेपाललाई जिताउन सहयोग गरेकी थिइन् ।

मनकेशी चौधरीले राष्ट्रिय तथा अन्तर्राष्ट्रिय किर्तिमान बनाउनुका साथै इंग्ल्यान्डविरुद्धको सिरिजमा र २०१९ मा पाकिस्तानविरुद्धको सिरिजमा प्लेयर अफ द सिरिज बनेकी थिइन् ।

आशाले पनि १४ बर्ष नेत्रहीन क्रिकेटमा योगदान दिएकी छिन् । उनी पनि पाकिस्तानविरुद्धको सिरिजमा प्लेयर अफ द सिरिज समेत हुन सफल भएकी थिइन् । संघले हरेक वर्ष २२ साउनलाई आफ्नो स्थापना दिवसको रुपमा मनाउँदै आएको छ ।