सम्पादकीय

खेलकुदको राष्ट्रिय तथा अन्तर्राष्ट्रिय घटनाक्रमलाई नेपाली भाषामा पाठक,दर्शकसम्म पुर्याउने उद्देश्यका साथ सुरु गरिएको हाम्रो खेलकुद डटकमले आज ५ वर्ष पूरा गरेको छ । फर्केर हेर्दा आधा दशकको यो खेलकुद पत्रकारिताको यात्रा कठीन तर, रोमाञ्चक रह्यो ।

पत्रकारितामा पछिल्लो समय व्यापकता पाइरहेको अनलाइन पत्रकारिता आफैमा चुनौतीपूर्ण छ । त्यसमा पनि खेलकुदको समाचार मात्र प्रकाशित गर्ने अनलाइन चलाउँने योजनासहित अघि बढ्ने निर्णय ५ वर्षअघि गर्नु त्यतिबेलै पनि जोखिमपूर्ण थियो नै । हाम्रो देशमा पत्रकारिता जीविकोपार्जनको बलियो आधार बन्न नसकिरहेको अवस्थामा खेलकुदको मात्र अनलाइन सञ्चालन गर्ने हाम्रो समूहको निर्णय धृष्टतापूर्ण थियो भन्नेमा हामी उहिले नै सचेत थियौं । तर, पनि आँट गरेरै नेपाली खेलकुदको विकास र विस्तारकै गतिमा अनलाइन खेल पत्रकारिताको पनि विकास र विस्तार हुँदै जान्छ भन्नेमा हामी विश्वस्त थियो । खेलकुदलाई मात्र समेटेर अनलाइन चलाउने प्रयास ‘सिक्दै गर्ने अघि बढ्ने’ अनुभव थियो ।

२०७२ साल वैशाख १२ र २९ गतेको विनाशकारी भूकम्पले ९ हजार भन्दा बढीको ज्यान गयो । अर्बौंको क्षति भयो । । त्यसपछि देशको आर्थिक र पुनर्निर्माणले कसरी गति लिन्छ भन्नेमा अशंका थियो । अझै पनि पुनर्निर्माणको काम सम्पन्न भइसकेको छैन । विनाशकारी भूकम्पपछि कसरी अन्य क्षेत्र जस्तै खेलकुदले गति लिन्छ भन्ने शंकाकै बीचमा २०७२ श्रावण १९ गतेबाट हाम्रो खेलकुद डटकम को यात्रा शुरु भएको थियो ।

हरेक यात्राको सुरुवात पहिलो पाइलाबाट हुन्छ भने जस्तै हाम्रो त्यो पहिलो पाइला थियो । निरन्तर पाइला अघि बढाउने क्रममा पाँचौं वर्ष पुरा गर्दै छैटौं वर्षमा प्रवेश गरिरहँदा हामीले समाचार, लेख र अन्य गरि २१ हजार भन्दा बढी सामग्री प्रकाशित गरिसकेको छौं । पाठक, दर्शकलाई खेलकुदका हरेक समाचारबाट सूसुचित गर्नुपर्दछ भन्ने हाम्रो मुल उद्देश्य थियो । त्यसमा आशिंक सफलता हासिल गरेको हाम्रो आफ्नै बुझाई छ । आउने दिनमा अझै बढी मिहिनेत गर्ने तत्परताले हामीलाई सफलताका बाँकी कथाहरु रच्न थप ऊर्जा र प्रोत्साहन मिल्छ भन्ने ठानेका छौं ।

सबै खेलको आ आफ्नै महत्व हुन्छ । त्यसलाई आधार मान्दै सबै खेलका समाचारलाई अनलाइनमा समेट्ने उद्देश्यबाट सुरु भएको हाम्रो अनलाइनलाई समाजिक सञ्जालको पहुँच, लोकप्रियता र बढ्दो प्रयोगकर्ताका कारण खेलकुदका समाचार पछ्याउनेहरुको माझमा पुग्न हाम्रो खेलकुदलाई बढी सहज भएको हामीले महसुस गरेका छौं ।
छैटौं वर्षमा प्रवेश गरिरहँदा हाम्रो खेलकुद डटकम ७ करोड पटक भन्दा बढी हेरियो भन्दा अन्यन्तै गर्व महसुस गरेका छौं । समाजिक सञ्जालका सबै माध्यममा हाम्रो खेलकुदलाई पछ्याउनेको संख्या १४ लाख भन्दा बढी हुनुहुन्छ ।

पाठक दर्शकहरुको साथ र मायाले हामी उत्साही त छौं नै अझ बढी जिम्मेवारीबोध पनि भएको छ । यात्राको सुरुवात गर्दा कस्तो प्रतिक्रिया आउँछ भन्नेमा अन्यौल थियो । काम गर्दै जाने क्रममा पाठक, दर्शकले हाम्रो कामलाई स्वीकार्दै गएको महसुस गरेका छौं । कोही पनि आफैमा पूर्ण हुँदैन । अभ्यास गर्दै जाने क्रममा धेरै सिकिन्छ । हाम्रो हकमा पनि त्यस्तै भयो । काम गर्दै जाने क्रममा केहि कमजोरी पक्कै हुन्छन् , त्यसलाई सुधार गर्ने तत्परता हामीले सधै राख्दै आएका छौं । यो अवधिमा हाम्रो फेसबुक र यूट्युब च्यानलमार्फत मुख्यतः भलिबलका राष्ट्रियदेखि अन्तर्राष्ट्रिय प्रतियोगिताको प्रत्यक्ष प्रसारण गर्दा दर्शकबाट पाएको साथले हामीलाई थप हौस्याएको छ ।

गत वर्ष एभिसी सेन्ट्रल जोन च्याम्पियनसिपको प्रत्यक्ष प्रसारण हाम्रा लागि अवसर जति थियो, त्यत्तिकै स्तरीय प्रसारणको चुनौती थियो । दर्शकहरुले दिनुभएको साथ र मायाले हामीले त्यो प्रत्यक्ष प्रसारणमा न्याय गरेका छौं भन्ने महसुस गरेका छौं । दुई दशक यता नेपाली खेलकुदले सबैभन्दा ठूलो प्रतियोगिताका रुपमा १३ औं दक्षिण एसियाली खेलकुद (साग) मा सिमित श्रोत साधानका बावजुद हामीले त्यसको समाचार संकलन, लेख, विचार र प्रत्यक्ष अन्तवार्ता गर्दा दर्शकहरुबाट त्यतिकै साथ पाएका थियौं । साग हाम्रा लागि पनि चुनौतीको सामना गर्ने एउटा राम्रो अवसर थियो । त्यसले खेलकुदको अनलाइन पत्रकारितामा उदाहरणीय काम गरेको महसुस गरेका छौं । तथापि अझै राम्रो गर्न सकिन्थ्यो भन्ने अहिले पनि लाग्छ ।

त्यसबाहेक नेपालका विभिन्न खेल टोलीले देश बाहिर गएर खेल्दा उनीहरुसँग जोडिएका सबै पक्ष र पाटालाई पाठक दर्शक सामू पुर्याएरहेका छौं । फुटबलको साफ च्याम्पियनसिपदेखि विश्वकप छनोट, क्रिकेटको विश्वकप छनोट र अन्य प्रतियोगिता तथा भलिबलको महिला एभिसी सेन्ट्रल जोनमा पनि हामीले आयोजना स्थलबाटै समाचार संकलन, सम्प्रेषण र प्रसारण गर्ने प्रयास गरेका थियो ।

अहिलेसम्मको यात्रामा प्राप्त गरेको हौसला र मायाप्रति हामी पाठक, दर्शकप्रति आभारी छौं । तपाईहरुको सल्लाह, सुझाव र आलोचनाले हामीलाई मार्गनिर्देश गरिरहेकै छन् । छैटौं वर्ष प्रवेश गरिरहँदा कोरोना भाइरस कोभिड १९ का कारण विश्व नै आतंकित भएको अवस्था छ । यसले सबै क्षेत्रमा ठूलो असर परेको छ । देश भित्रका खेलकुद गतिविधि पूर्णरुपमा ठप्प हुँदा त्यसको प्रत्यक्ष असर खेलाडी र खेलकर्मीमा पर्ने नै भयो । खेलाडी र खेलकर्मीलाई गरेको असरले हाम्रो खेलकुद मात्रै अछुतो रहने कुरै भएन ।

खेलकुद भित्रका सबै खाले गतिविधिको समाचार, लेख, अन्तवार्ता, भिडियो रिपोर्ट, विभिन्न खेलका प्रत्यक्ष प्रसारणलाई आउँने दिनमा पनि निरन्तरता दिनेनै छौं । तथ्यमा आधारित सामग्री प्रस्तुतिलाई हामी आफ्नो धर्म मानछौं । र, मानिरहने छौं । खेलकुदमा भएका विकृति र विसंगतीलाई रोक्नका लागि पनि हामी आफ्नो माध्यमबाट सशक्त रुपमा प्रस्तुत हुने नै छौं । समयअनुकुल पाठक, दर्शकको चाहनालाई ध्यानमा राख्दै विभिन्न सामग्री प्रस्तुत गर्न हाम्रो हरसम्भव प्रयास रहने छ ।

अहिलेको समय सामाजिक सञ्जालमार्फत पनि आफ्ना सुझाव, सल्लाह र आलोचना गर्न सकिने सुविधालाई पाठक, दर्शकले पूर्ण उपयोग गर्दै हामीलाई मार्गनिर्देश गर्नुहुनेछ भन्नेमा हामी विश्वस्त छौं । यो यात्रामा साथ दिने पाठक, दर्शक र व्यावसायिक रुपमा साझेदारी गर्ने व्यापारिक समूह र सहयोगीहरुप्रति हामी सदा सर्वदा आभारी छौं ।

जय खेलकुद!