अनुलाई कांग्रेसको सम्मान

काठमाडौं (हाम्रो खेलकुद)– १३ औं दक्षिण एसियाली खेलकुद (साग) की स्वर्ण पदक विजेता अनु अधिकारीलाई नेपाली कांग्रेसको खेलकुद विभागले सम्मान गरेको छ । खेलकुद विभागले नुवाकोटको नेपाली कांग्रेस पन्चकन्या गाँउपालिका वडा नं ४ मार्फत अनुलाई सम्मान गरेको हो ।

अनु पन्चकन्याकी स्थायी बासिन्दा हुन् । कांग्रेस खेलकुद विभागका सदस्य राजु कडेलले शनिबार काठमाडौंमा अनुलाई सम्मान पत्र हस्तान्तरण गरेका थिए । गत वर्ष मंसिरमा स्वेदशमा आयोजना भएको १३ औं सागमा अनुले करातेको कुमुतेमा स्वर्ण पदक जितेकी थिइन् । कांग्रेसको खेलकुद विभागले केहि दिन अघि पत्रकार सम्मेलन गर्दैै सागका स्वर्ण पदक विजेतालाई सम्मान गर्ने घोषणा गरेको थियो ।

एसियाली खेलकुदको समेत अनुभव बटुलिसकेकी अनु अहिले ओलम्पिकको तयरीमा जुटेकी छिन् । अर्को वर्ष जापानमा आयोजना हुने ओलम्पिक छनोटका लागि उनलाई नेपाल ओलम्पिक कमिटी (एनओसी) ले छात्रबृति प्रदान गरेको छ ।

ओलम्पिकमा पहिलो पटक करातो समावेश गरिएको छ । जापानको टोकोयोमा यो वर्ष हुनुपर्ने ओलम्पिक कोभिड १९ कारण अर्को वर्षलाई सरेको छ । दीपक श्रेष्ठको प्रशिक्षणमा अनुसँगै ओलम्पिकको छनोट का लागि नविन रसाइलीले केहि साता अघि बाट अभ्यास थालेका थिए ।