काठमाडौं (हाम्रो खेलकुद)— नेपाल ओलम्पिक कमिटी (एनओसी) ले आफ्ना उपाध्यक्ष चतुरानन्द राजवैद्यलाई कार्यकारी निर्देशक नियुक्त गरेको छ । अखिल नेपाल टेबल टेनिस संघका अध्यक्ष समेत रहेका राजवैद्यलाई एनओसीले बुधबार कार्यकारी निर्देशक नियुक्त गरेको हो । एनओसीमा कार्यकारी निर्देशक हुने राजवैद्य पहिलो हुन् ।

एनओसी अध्यक्ष तथा सांसद जीवनराम श्रेष्ठ र कोषाध्यक्ष रतन टन्डनले राजवैद्यलाई कार्यकारी निर्देशकको आधिकारिक नियुक्ति पत्र हस्तान्तरण गरे । ओलम्पिक कमिटिको विधानको च्याप्टर ९ को आर्टिकल ३७ को उपधारा १ बमोजिम कार्यकारी बोर्डले एनओसीको दैनिक प्रशासकिय कार्य सञ्चालनको लागि राजवैद्यलाई कार्यकारी निर्देशक तोक्ने निर्णय गरेको थियो ।

एनओसी अध्यक्ष श्रेष्ठले राजवैद्यलाई बधाई दिदै एनओसीमा कार्यकारी निर्देशक पहिलोपटक नियुक्त गरिएकाले यो ऐतिहासिक रहेको बताएका छन् । पूर्व खेलाडी राजवैद्यले लगातार तीनपटक मेन्स डबल्समा राष्ट्रिय टेवल टेनिस च्याम्पियन बनेका थिए । एकलमा भने उनले तेस्रो स्थान हासिल गरेका थिए ।

उनले इन्टर कलेज टीटी च्याम्पियनसिप जितेको थियो । राजवैद्य २०४६ मा संघमा सदस्यको रुपमा प्रवेश गरेका थिए । त्यसपछि उनी कोषाध्यक्ष र २०६३ मा अध्यक्षमा निर्वाचित भएका थिए । त्यसयता उनी निरन्तर अध्यक्ष छन् । राजवैद्य २०११ देखि २०१५ सम्म एनओसी सदस्य रहेका थिए । गत वर्षको एनओसी साधारण सभाबाट उनी उपाध्यक्षमा निर्वाचित भएका थिए ।