काठमाडौं (हाम्रो खेलकुद) – गत वर्ष मंसिरमा नेपालमा आयोजना भएको १३औं दक्षिण एसियाली खेलकुद (साग) मा भारोत्तोलनतर्फ स्वर्ण विजेता सन्जु चौधरी नेपालगन्ज उपमहानगरपालिकाबाट सम्मान गर्ने भन्दै अपमानित भएकी छिन् ।

नेपाल प्रहरीकी सन्जु नेपालगन्जलाई २२ वर्षपछि भारोत्तोलनमा स्वर्ण दिलाउने खेलाडी हुन् । उनले सागको महिला ५९ केजी तौल समूहमा स्वर्ण जितेका थिइन् । १३औं सागकै कास्य विजेता प्रकाश केसीलाई उपमहानगरपालिकाले ५० हजारसहित सम्मानित गर्दा सन्जु भने खालि हात फर्किन बाध्य भइन् छन् । प्रकाशले ७३ केजी तौलसमूहमा कास्य जितेका थिए ।

नेपालगन्ज उप–महानगरपालिकाले मंगलबार सातौं नगरसभाको अवसर पारेर खेल क्षेत्रबाट सफलता हासिल गर्ने खेलाडीलाई सम्मान गर्ने भनेर बोलाएपनि सम्मान नगरी खाली हात फिर्ता पठाएर अपमान गरेको सन्जुले बताइन् । कार्यक्रम हुनुभन्दा केहि घण्टाअघि मात्र खबर पाएकी उनले आफू उपस्थित हुन नसक्दा आफ्नो अभिभावकलाई पठाएकी थिइन् ।

आफू काठमाडौंमा रहेका कारण आउने नसक्ने भएपछि सन्जुका बुवालाई सम्मान कार्यक्रममा गएका थिए । आवश्यक कागजात नपुगेको भन्दै उपमहानगरले फिर्ता पठाउँदा सन्जुले दुख व्यक्त गरिन् । ‘हामी खेलाडीको स्वाभिमान हुँदैन र ? कुरा नबुझी सम्मान छ भन्दै बोलाउने । आफू नसके परिवारको जो कसैलाई पठाउ भन्ने । परिवार पुगेपछि कुरा मिलेन भनेर जाउ भन्ने ? हामीलाई पैसा चाहिएको होइन, तर सम्मान भने आफैंले बोलाएर पछि फिर्ता पठाउनु दुखलाग्दो छ । खेलाडीमाथि गरिने यस्तो व्यवहारले मनोबल र आत्मसम्मानमा आँच आउने छ,’ सन्जुले भनिन् ।

‘यस्तै हुने हो भने आउने दिनमा अरू खेलाडीको परिवारले आफ्ना सन्तानलाई खेल्न दिन्छन् र ?’ सन्जुले आक्रोसको भावमा लेखेकी छन् । यस्तै सन्जुले खेलाडीले देशका लागि खेल्ने र पैसा होइन स्वाभिमान चाहिएको बताएकी छन् ।