प्रकाश तिमल्सिना,काठमाडौं

राष्ट्रिय खेलकुद परिषद् (राखेप) को नयाँ सदस्य सचिवमा नियुक्त हुने सबै भन्दा बलियो सम्भावना रहेका रमेशकुमार सिलवालले सो पदका निवेदन दिने विषयमा निर्णय लिई नसकेको बताएका छन् ।

युवा तथा खेलकुद मन्त्रालयले राखेप नयाँ सदस्य सचिवका लागि शुक्रबार दरखास्त आव्हान गरेको थियो । खेलकुद विकास ऐन २०७७ को प्रावधान अनुसार मन्त्रालयले सार्वजनिक सुचना जारी गर्दै सदस्य सचिवका लागि दरखास्त आव्हान गरेको हो ।

६ दशक लामो इतिहास बोकेको राखेपमा खुला आव्हानबाट सदस्य सचिव नियुक्त हुन लागेको यो पहिलो पटक हो । यसअघि खेलकुद मन्त्रीले सदस्य सचिव नियुक्त गर्दै आएका थिए । सदस्य सचिव सिफारिसका लागि शुक्रबार नै ३ सदस्यीय सिफारिस समितिले पूर्णता पाएको थियो ।

निर्वतमान सदस्य सचिव सिलवालले सबै प्रक्रिया आफ्नो नोटिसमा रहे पनि सदस्य सचिवका लागि आवेदन दिने विषयमा निर्णय लिइ नसकेको बताएका छन् । ‘सदस्य सचिवका लागि सिफारिस समिति बनेको, त्यसले कार्यविधि बनाएको भन्ने मेरो जानकारीमा छ,’ उनले भने, ‘सदस्य सचिव बन्न चाहनेले कार्ययोजना पेश गर्नुपर्ने भन्ने पनि थाहा छ । समय बाँकी छ । अहिले केहि सोचेको छैन । म अध्ययनकै क्रममा छु ।’

सिलवालले अहिले जति पनि प्रक्रिया भइरहेका छन् यसले सदस्य सचिव नियुक्तीको प्रक्रियालाई लम्बाई रहेको पनि बताए । ‘यो जागिर खने निवेदन जस्तो होइन, ‘उनले थपे, ‘यो प्रक्रियालाई फास्ट ट्रयाकबाट गर्न सकिन्थ्यो । ‘

प्रधानमन्त्री केपी ओलीका निकटका सिलवालले चाहँदा सम्म सम्भवत अर्को व्यक्ति सदस्य सचिव नियुक्ती हुने सम्भावना कम भएको खेलकुद क्षेत्रमा चर्चा छ । सदस्य सचिवका लागि आवश्यक सबै ५ मापदण्ड पुरा गर्ने र सदस्य सचिवको एक वर्षको अनुभव बटुलेका सिलवाल प्रधानमन्त्री ओलीका विश्वास पात्र हुन् ।

सिफारिस समितिले मन्त्रालय र मन्त्रालयले मन्त्रीपरिषद्मा लगेर सदस्य सचिवको नियुक्त गर्ने भएकाले प्रधानमन्त्री ओलीले रुचाएको व्यक्ति सदस्य सचिव हुने नै सबै भन्दा बलियो सम्भावना रहन्छ । यद्दपी सिलवाल अझै आफ्नो पत्ता खोल्ने पक्षमा भने देखिएका छैनन् ।

सिलवालले सदस्य सचिवमा पुनः नियुक्ती लिन चाहेको खण्डमा नयाँ ऐनको व्यवस्तालाई उनले पुरा गर्न भने बाध्य हुनेछन् । ऐन लागु हुुँदा पनि केहि समय आफ्नो पद यथावत रहने बताए सिलवालले बताएपनि मन्त्रालयले कार्यवहाक सदस्य सचिव तोकेपछि सिलवालले सो निर्णयलाई मान्नु परेको थियो ।

खेलकुद विकास ऐनका अनुसार मन्त्रालयका सचिव रामप्रसाद थपलिया सिफारिस समितिका संयोजक रहनेछन् । युवा तथा खेलकुद मन्त्री जगत सुनार विश्वकर्माले शुक्रबार रिम रानाभाट र इन्दिरा निरौलालाई सदस्य चयन गर्दै सिफारिस समितिलाई पूर्णता दिएका थिए । समितिको शुक्रबार नै बसेकको बैठकले कार्यविधि तयार गरेको छ ।

ऐनले तोकेको मापदण्ड पुरा गर्ने व्यक्तिले ७ दिन भित्रमा सदस्य सचिवका लागि आवेदन दिने सक्नेछन् । सदस्य सचिवको इच्छुक उमेदवारले कार्ययोजनासहित मन्त्रालयमा इमेलका मार्फत पेश गर्न सक्ने कार्यविधिमा उल्लेख गरिएको छ ।

कार्ययोजनाको अध्ययनपछि एक महिलासहित कम्तीमा ३ जनाको नाम समितिले सिफापिरस गर्नेछ । मन्त्रालयले मन्त्रीपरिषद्मा उमेदवारको नाम प्रस्तुत गर्ने र त्यसबाट एक जना सदस्य सचिवमा नियुक्त हुनेछन् ।

कार्यविधिमै सदस्य सचिवका लागि आवश्यक निवेदन नपरेमा वा परेका निवेदन पनि आयोग्य भएमा पुन अर्को सुचना जारी गर्न सक्नेछ । दोस्रो पटक सुचना जारी गर्दा पनि आवश्यक संख्यामा निवेदन नपरेमा वा परेका निवेदनमा योग्य नभएमा समितिले उपयुक्त व्यक्ति छनोट गरि औचित्यका आधारमा सिफारिस गर्न सक्नेछ ।

नयाँ ऐनअनुसार राखेपको सदस्यसचिवका लागि पाँचवटा मापदण्ड तोकिएको छ । जसमा नेपाली नागरिक, स्नातक उत्तीर्ण, ३० वर्ष पूरा भएको, कम्तीमा पाँच वर्ष खेलकुदको अनुभव र प्रचलित कानुनले अयोग्य नभएको हुनुपर्ने उल्लेख छ ।

राष्ट्रपति विद्यादेवी भण्डारीले असार १० गते खेलकुद विकास ऐन २०७७ प्रमाणिकरण गरेपछि निवर्तमान सदस्यसचिव सिलवालसहित परिषदका उपाध्यक्ष र अन्य सदस्यहरु पदमुक्त भएका थिए ।