काठमाडौं (हाम्रो खेलकुद) – राष्ट्रिय टिम तयारी समितिका संयोजक तथा १३औं दक्षिण एसियाली खेलकुद (साग) को नेपाली टोलीका सहायक सेभ द मिसनसमेत रहेका रिम बहादुर रानाभाटले १३औं सागको समग्र प्रतिवेदन प्रस्तुत गरेका छन् ।

युवा तथा खेलकुद मन्त्रालयको संयोजनमा तयार भएको २२ पेज लामो प्रतिवेदन सहायक सेभ दि मिसन रानाभाटले शुक्रबार नेपाल ओलम्पिक कमिटि (एनओसी) लाई हस्तान्तरण गरेका हुन् । रानाभाटले प्रतिवेदन सार्वजनिक गरेपछि एनओसीका अध्यक्ष जीवनराम श्रेष्ठले रानाभाटलाई धन्यवाद दिदै १३औं साग सबै सरोकारवाला निकायको सामुहिक प्रयासका कारण ठुलो सफलता हात पारेको बताए ।

अध्यक्ष श्रेष्ठले यो प्रतिवेदन भविष्यको कार्यक्रमको लागि पनि सहयोगी हुने विश्वास व्यक्त गरे । कार्यक्रममा एनओसीका उपाध्यक्ष अशोकरत्न बज्राचार्य, चतुरानन्द राज वैद्य र महासचिव निलेन्द्रराज श्रेष्ठको सहभागिता थियो ।

गत वर्ष मंसिर १५ देखि २४ गते सम्म काठमाडौं, पोखरा र जनकपुरमा भएको प्रतियोगितामा नेपालले ऐतिहासिक ५१ स्वर्ण, ६० रजत र ९६ कास्यपदकसहित कुल २०७ पदक जित्दै दोस्रो स्थानमा हात पारेको थियो ।

३६ वर्षे लामो साग इतिहासमा नेपालले जितेको यो सबैभन्दा धेरै स्वर्ण र पदक हो । नेपाल त्यसअघि सन् १९८४ मा पहिलो र १९९९ मा आठौं सस्करणको साग आयोजना गरेको थियो ।

यसैबीच रानाभाट राष्ट्रिय खेलकुद परिषद् (राखेप)को सदस्य सचिव सिफारिस समितिको सदस्यमा नियुक्त भएका छन् । युवा तथा खेलकुद मन्त्रालयको सचिव रामप्रसाद थपलियाको संयोजकत्वमा रहेको समितिमा अर्काे सदस्यका रुपमा राखेपकी पूर्व सदस्य इन्दिरा निरौला नियुक्त भएकी छिन् ।

खेलकुद मन्त्री जगतबहादुर विश्वकर्माले शुक्रबार समितिलाई पूर्णता दिने क्रममा रानाभाट र निरौलालाई सदस्य नियुक्त गरेका हुन् । अब राखेपमा नयाँ सदस्य सचिव नियुक्तीका लागि प्रक्रिया सुरु भएको छ। मन्त्रालयले शुक्रबार नै सुचना जारी गर्दै ७ दिन भित्र राखेप सदस्य सचिवमा आवेदनका लागि खुला आव्हान गरको छ।